بادینان دەیلی:
وەزیرێ خواندنا بلند و ڤەکۆلینێن زانستی ل هەرێما کوردستانێ ڕاگەهاند، کو ل دویماهییا ڤێ مەهێ دێ ل گەل وەزارەتا پەروەردەیێ کۆم بن ژ پێخەمەت بڕیاردانێ ل سەر چارەنڤیسێ خواندنا ئەڤ سالە، دوپات ژی کر کو سلامەتییا قوتابیان ل سەری لیستەیا کارێن وان دایە.
ل دویڤ لێدوانەکا د. ئارام محەمەد قادر، وەزیرێ خواندنا بلند، بڕیارە ل ٢٧ یان ٢٨ێ ئادارا ٢٠٢٦ێ، کۆمبوونەکا هەڤپشک د ناڤبەرا هەردو وەزارەتێن (خواندنا بلند و پەروەردێ) دا بهێتە ئەنجامدان. ئارمانج ژ ڤێ کۆمبوونێ ئەوە بڕیارەکا گونجای بدەن کو د بەرژەوهندییا قوتابی، مامۆستا و فەرمانبەران دا بیت.
ئەڤ پێنگاڤە د دەمەکێ دایە، ژبەر تێکچوونا بارودۆخێ ناوچەیێ و شەڕێ د ناڤبەرا (ئەمریکا و ئسرائیل) ل گەل (ئیرانێ)، ژ ٢٨ێ شوباتا ٢٠٢٦ێ وەرە پرۆسەیا خواندنێ ل هەرێما کوردستانێ هاتییە راگرتن. ل دویڤ خشتەیێ پێشوەخت، بڕیارە ڕۆژا ئێکشەمبییا بهێت بێهنڤەدانا هاتییە راگەهاندن ب دویماهی بهێت.
وەزیرێ خواندنا بلند ئاماژە ب وێ چەندێ کر: “پاراستنا گیانێ قوتابی و مامۆستایان ژ هەمی تشتەکی گرنگترە، ئەم دخوازین ب کێمترین زیان ڤێ رەوشێ دەرباز بکەین.” هەروەسا گۆت ژی کو هەردو وەزارەت دێ ب هەماهنگی ل گەل جڤاتا وەزیران بڕیارا دوماهییێ دەن.
دەربارەی بژاردەیێن ل بەر دەست بۆ بەردەوامیدان ب خواندنێ، د. ئارام ئاشکرا کر کو چەندین پێشنیار ل سەر مێزێ نە و دێ گۆتوبێژ ل سەر هێتە کرن، لێ ب ئاشکرایی گۆت: “ئەز ب خۆ دژی خواندنا ئۆنلاینم.”
ل دویماهیێ وەزیری دیار کر کو میکانیزما کارکرنێ ب ڤی ڕەنگی دبیت؛ هەر وەزارەتەک دێ کۆمبوونێن خۆ یێن جودا ئەنجام دەت و پاشان د کۆمبوونا هەڤپشک دا بڕیارا نهایی دێ هێتە ڕاگەهاندن.
بادینان دەیلی | ٢٠٢٦
