بادینان دەیلی – بەغدا:
نووری مالکی، سەرۆکێ هەڤپەیمانییا دەولەتا قانوون و بەربژێرێ چارچۆڤەیێ هەماهەنگیێ بۆ وەرگرتنا پۆستێ سەرۆکوەزیرێن ئیراقێ، مەرجێن خۆ بۆ ڤەکێشانا ژ کێبەرکێیێ ئاشکرا کرن.
مەرجێن مالکی بۆ ڤەکێشانێ
ژێدەرەکێ ئاگەهدار ژ ناڤ چارچۆڤەیێ هەماهەنگیێ راگەهاند: نووری مالکی رازیبوونا خۆ نیشاندایە کو ژ بەربژێربوونێ ڤەکێشیت، لێ ب مەرجەکێ؛ نابیت ب چو رەنگان محەمەد شیاع سوودانی و حەیدەر عەبادی بۆ وەرگرتنا پۆستێ سەرۆکوەزیران بهێنە بەربژێرکرن.
کەسەکێ هەڤپشک
مالکی جەختێ ل سەر وێ یەکێ دکەت کو دڤێت ئەو کەسێ دهێتە دەستنیشانکرن، ببیتە جهێ رەزامەندییا هەمی ئالییان، و ب تایبەتی ژی دڤێت ئەو بخۆ (مالکی) یێ ل سەر رازی بیت.
هەڤدژیا د ناڤبەرا ئالییان دا
ل هەمان دەم دا، بزاڤێن دی یێن سیاسی ل بەغدا هەنە، ب تایبەت ژ لایێ عەسایب ئەهل ئەلحەق و ژمارەکا ئالیێن دی یێن چارچۆڤەیێ هەماهەنگیێ، کو د سەنگەرا پشتەڤانیێ دانە بۆ هندێ جارەکا دی باوەری ب محەمەد شیاع سوودانی بهێتە دان و د پۆستێ خۆ دا بەردەوام بیت.
پاشخستنا بڕیارێ بۆ پشتی جەژنێ
ل گۆڕەی پێشهاتێن نوو، چاڤەڕێ ناهێتە کرن ئەڤ مژارە بەری جەژنێ بهێتە ئێکلاکرن. بڕیارە پشتی بێهنڤەدانا جەژنێ، ئالیێن سیاسی یێن شیعە دەست ب زنجیرەکا کۆمبوونێن چڕ بکەن داکو بگەهنە رێککەفتنەکێ ل سەر ناڤێ بەربژێرێ داهاتی.
