بادینان دەیلی – هەولێر:
ل رۆژەکا وەک ئەڤرۆ دا و بەری ٣٥ سالان، ل ١١ی ئادارا ١٩٩١ێ، خەلکێ خۆڕاگرێ باژێرێ هەولێرێ ب هەماهەنگی دگەل مەفرەزەیێن پێشمەرگەیێن کوردستانێ، دژی زۆرداری و ستەما رژێما بەعس ڕاپەڕین و د دەمەکێ کێم دا باژێر ژ چنگێن داگیرکەران رزگار کر.
خەجە باوە؛ سیمبولا قەهرەمانییا ئافرەتێ
د راپەرینا هەولێرێ دا، ئافرەتێن کورد رۆلەکێ کاریگەر و مێژوویی گێڕان. (خەجە باوە) وەک ئێک ژ ئافرەتێن تێکۆشەرێن هەولێرێ، د وێ راپەرینێ دا شەهید بوو و ناڤێ وێ وەک سیمبولا قەهرەمانییا ئافرەتا کورد د مێژوویا نەتەوا مە دا هاتە تۆمارکرن.
شکاندنا هەیبەتا رژێما بەعس
راپەرینا هەولێرێ وەرچەرخانەکا مەزن بوو، چونکی ئەڤ باژێرە د وی دەمی دا مەلبەندەکێ سەرەکی یێ سەربازی و ئەمنی یێ رژێما بەعس بوو و چەندین سەربازگەهـ و دەزگەهێن هەوالگێری یێن ب هێز تێدا هەبوون. رزگارکرنا هەولێرێ هەیبەتەکا مەزن دا وورەیا خەلکێ کوردستانێ و بڵێسەیا شۆرەشێ ب هێزتر لێ کر.
تۆلەکردنەڤە ژ ئەنفال و کیمیابارانێ
پشتی باژێرێ سلێمانیێ، هەولێر دووەم مەزنە باژێر بوو کو ب تەمامی هاتە رزگارکرن. خەلکێ هەولێرێ یێ کو ئازارێن ئەنفال، کیمیاباران و وێرانکرنا پتر ژ ٤ هزار گوندان دیتبوون، ب خوینا خۆ تۆلا خۆ ژ رژێما بەعس ڤەکر و ناسنامەیا نەتەوەیی و کوردستانی بۆ باژێری زڤراندنەڤە، کو ئەڤرۆ هەولێر وەک پایتەختەکێ گەشەکرى ل رۆژهەلاتا ناوەڕاست دهێتە نیاسین.
ژێدەر: بادینان دەیلی
رێکەفت: ١١/٣/٢٠٢٦
