بادینان دەیلی:
سەرۆکێ هەرێما کوردستانێ، نێچیرڤان بارزانی، د سالیادا رێککەفتننامەیا ١١ی ئادارێ دا پەیامەک بەلاڤکر و تێدا راگەهاند کو ئەڤ رێککەفتنە تنێ دەستکەفتەکێ نەتەوەیی نەبوو، بەلکو نەخشەرێیەکا نموونەیی بوو بۆ چەسپاندنا ئاشتی و پێکڤەژیانێ ل عێراقێ.
بنیاتێ دەستکەفتێن هەرێمێ
نێچیرڤان بارزانی د پەیاما خۆ دا ئاماژە ب وێ یەکێ کر کو رێککەفتننامەیا ١١ی ئادارا ١٩٧٠ێ، کو ب رێبەرایەتییا بارزانیێ نەمر و شۆرەشا مەزنا ئەیلوولێ هاتە ئاراوە، وەک ئێکەم بەلگەنامەیا فەرمی یا دانپێدانان ب مافێن گەلێ کوردستانێ د مێژوویا هەڤچەرخ دا دهێتە نیاسین. هەروەسا دیارکر کو ئەڤ رێککەفتنە بوو بنەغە بۆ هەمی دەستکەفتێن دویڤ دا یێن هەرێما کوردستانێ.
باجا پاشگەزبوونێ ژ رێککەفتنێ
سەرۆکێ هەرێمێ د پەیاما خۆ دا گوت: “مێژوویێ سەلماند کو پاشگەزبوونا دەسهەلاتدارێن وی دەمی یێن عێراقێ ژ وێ رێککەفتنێ و پەنابرن بۆ لۆژیکا هێزێ ل شوینا دیالۆگێ، عێراق بەرەڤ چەندین دەیەیێن شەڕ، مالوێرانی و نە سەقامگیریێ بر، کو هەتا ئەڤرۆ ژی عێراق باجا وان هەلە مێژوویی ددەت.”
پەیامەک بۆ لایەنێن سیاسی و عێراقێ
د پشکەکا دی یا پەیامێ دا، نێچیرڤان بارزانی جەخت ل سەر پێدڤییا ئێکڕیزی و تەباییێ د ناڤبەرا لایەنێن کوردستانی دا کر وەک تاکە گەرەنتی بۆ پاراستنا قەوارێ فیدرالی و مافێن دەستووری. هەروەسا داخواز کر کو ل عێراقێ پەند ژ مێژوویێ بهێتە وەرگرتن و سەقامگیری ب رێکا یەکتری قبوولکرن و چەسپاندنا سیستەمێ فیدرالی و دادپەروەریێ بهێتە دیارکرن.
د دویماهییا پەیاما خۆ دا، سەرۆکێ هەرێمێ سەرێ ڕێز و نەوازشێ بۆ گیانێ پاکێ شەهیدان چەماند و سڵاڤ بۆ تێکۆشەر و پێشمەرگەیێن قارەمان هنارتن.
ژێدەر: بادینان دەیلی
رێکەفت: ١١/٣/٢٠٢٦
