دەستهەلاتا فڕۆکەڤانییا مەدەنی یا ئیراقێ ب فەرمی بڕیارا قەدەغەکرنا گواستنا زێڕ و ئامیرێن مۆبایلێ ب ڕێکا فڕۆکەخانەیێن هەرێما کوردستانێ هەلوەشاند.
سپێدەیا ئەڤڕۆ، دەستهەلاتا فڕۆکەڤانییا مەدەنی نڤیسارەک ئاراستەی هەمی کۆمپانییێن فڕۆکەڤانی کربوو، کو تێدا گواستنا زێڕ و مۆبایلان ب ڕێکا فڕۆکەخانەیێن هەرێمێ قەدەغە کربوو؛ ئەڤ یەک ژی ب بەهانەیا نەبوونا ئۆفیسێن کۆنترۆلا جۆری یا فیدرالی ل وان فڕۆکەخانەیان.
ل دۆر ڤێ مژارێ، جیهان دیوان، ڕێڤەبەرێ ڕاگەهاندن و پەیوەندییان ل دەستهەلاتا فڕۆکەڤانییا مەدەنی یا ئیراقێ ڕاگەهاند: “ئەو بڕیارە هاتە هەلوەشاندن و چیدی کار پێ ناهێتە کرن. نڤیسارا هەلوەشاندنا بڕیارێ دێ گەهیتە دەستێ هەمی کۆمپانییێن فڕۆکەڤانی و هەر دو فڕۆکەخانەیێن هەولێر و سلێمانییێ.”
ژ لایێ خۆ ڤە، عەبدولعەزیز هنداوی، پەیڤدارێ وەزارەتا پلاندانانا ئیراقێ ئاماژە ب وێ چەندێ کر، کو پێدڤییە ئۆفیسێن دەزگەهێ کۆنترۆلا جۆری یێن فیدرالی ل فڕۆکەخانەیێن هەولێر و سلێمانییێ ژی بهێنە ڤەکرن، ب هەمان شێوەیێ فڕۆکەخانەیێن بەغدا، بەسرە، نەجەف و کەرکووکێ.