پسپۆرێن ئێمناهییا سایبەری (Cyber Security) هوشدارییەکا توند ددەنە هەمی بکارهێنەرێن ئامیرێن کۆمپانیا ئەپڵ (ئایفۆن و ئایپاد) دەربارەی فێڵەکا نوو یا ئەلەکترۆنی کو ب رێکا “رۆژژمێرێ” (Calendar) دهێتە ئەنجامدان.
فێڵا نوو چاوانە؟
ئەڤ فێڵە پێدڤی ب دابەزاندنا چو بەرنامەیێن خراب نینە، بەلکو فێڵباز مفای ژ تایبەتمەندیا “داخوازنامەیێن رۆژژمێرێ” (Calendar invites) وەردگرن. ئەڤە ژی ب ڤی شێوەی دکەن:
- بکارهێنەر ل سەر لینکەکێ گۆماناوی ل ئەنتەرنێتێ کلیک دکەت.
- ب شێوەیەکێ ئۆتۆماتیکی ئامیرێ وی دبیتە هەڤپشک (Subscribe) د رۆژژمێرەکا ڤەشارتی دا.
- پاشان، ئامیرێ تە ب سەدان ئاگەداریێن (Alerts) درۆین تژی دبیت، وەک پەیامێن: “ئایفۆنێ تە ڤایرۆس هەیە” یان “تە خەڵاتەکێ مەزن برییە”.
ئارمانج ژ ڤێ کارێ چییە؟
مەرەما سەرەکی یا فێڵبازان ئەوە کو ترسێ ل دەڤ بکارهێنەری پەیدا بکەن دا کو نەچار ببیت کلیکێ ل سەر لینکێن وان بکەت و پاشان زانیارییێن وی یێن کەسی وەک (پاسۆردێن هەژماران و زانیارییێن بانکی) بدەستخۆڤە بینن.
کۆمپانیا ئەپڵ چ دبێژیت؟
تیمێن ئێمناهییا ئەپڵ دوپات دکەن کو ئەڤ پەیامە هەمی د ساختەنە و کۆمپانیا ئەپڵ ب چو رەنگان پەیامێن ئێمناهیێ یان هوشدارییێن ڤایرۆسێ ب رێکا بەرنامێ رۆژژمێرێ (Calendar) بۆ بکارهێنەران ناهنێریت.
چاوانیا چارەسەرکرنێ:
ئەگەر تە هەست ب هەبوونا ئاگەدارییێن غەریب د رۆژژمێرا خۆ دا کر، ڤان گاڤان پەیڕەو بکە:
- بچۆ بۆ Settings (رێکخستنەکان).
- پاشان Apps، و پاشان Calendar.
- بچۆ سەر پشکێ Calendar Accounts.
- ل وێرێ پشکەک ب ناڤێ Subscribed Calendars هەیە، هەر هەژمارەکا تە نەنیاسی ل وێرێ بسرێژە (Delete).
یان ژ ناڤ خودێ بەرنامێ رۆژژمێرێ (Calendar App):
- بەرنامەی ڤەکە و کلیکێ ل سەر پەیڤا “Calendars” ل خوارێ بکە.
- ل سەر وێ رۆژژمێرا گۆماناوی کلیکێ ل سەر نیشانا (i) بکە.
- پاشان ل خوارێ کلیکێ ل سەر Report Junk بکە.
ئامۆژگاری: باشترین رێ ئەوە تو د رێکخستنان دا “پەسەندکرنا ب دەست” (Manual approval) بۆ داخوازنامەیێن رۆژژمێرێ کارا بکەی دا کو ب شێوەیەکێ ئۆتۆماتیکی چ تشت بۆ ئامیرێ تە نەهێت.