ئامارێن نووی یێن ل پارێزگەها دهۆکێ نیشان ددەن کو سەرەڕای کێمبوونا هندەک تاوانێن وەک کوشتن و دزیێ، لێ سکاڵایێن پەیوەست ب خراپ بکارئینانا ئامیرێن پەیوەندیکرنێ و سۆشیاڵ میدیایێ ب رەنگەکێ بەرچاڤ زێدە بووینە. ل دویڤ داتایان، نوکە نێزیکی ٢٠٪ ژ کۆی گشتی یێ دۆسیەیێن ل دادگەهێن پارێزگەهێ دهێنە بینین، پەیوەندی ب سۆشیاڵ میدیایێ ڤە هەیە.
ل دویڤ یاسایا ژمارە ٦ یا سالا ٢٠٠٨ێ یا پەرلەمانێ کوردستانێ، یا تایبەت ب “قەدەغەکرنا خراپ بکارئینانا ئامیرێن پەیوەندیکرنێ”، سزایێن توند بۆ وان کەسان هاتینە دیارکرن یێن سۆشیاڵ میدیایێ بۆ مەبەستا ناوزڕاندن، گەفکرن، یان بەلاڤکرنا وێنەیێن تایبەت یێن خەلکی بکار دئینن.
نەوزاد سەعید، پارێزەر، دەربارەی سزایان دیار کر: “سزایێ یاسایی بۆ ڤان تاوانان پێکدهێت ژ زیندانیکرنێ بۆ ماوەیەکێ کو ژ ٦ هەیڤان کێمتر نەبیت و ژ ٥ سالان پتر نەبیت، هەروەها غەرامەکرنا تاوانباری ب کوژمێ ئێک ملیۆن تا ٥ ملیۆن دیناران.”
رێڤەبەریا پۆلیسێن پارێزگەها دهۆکێ جەختێ ل سەر هندێ دکەت کو پشکەکا زۆر یا ڤان کێشەیان ژبەر نەبوونا هۆشیارییا پێدڤی یا تەکنەلۆژیایێ دناڤ جڤاکی دا دهێنە پێش. پۆلیس داخوازێ ژ وەلاتییان دکەت کو د دەمێ تووشبوون ب هەر کێشەیەکا ئەلەکترۆنی، پەنایێ بۆ رێگەچارەیێن عەشایەری و جڤاکی نەبەن، بەلکو راستەوخۆ پەنایێ بۆ یاسایێ ببەن.
هێمن سلێمان، پەیڤدارێ پۆلیسێن دهۆکێ، د ڤی واری دا گۆت: “داخوازێ ژ وەلاتییان دکەین، کچ بن یان کوڕ، ژن بن یان پیاو، هەر کاتەکێ تووشی کێشەیەکا ب ڤی ڕەنگی بوون، بلا سەرهەدانا بنکەیێن پۆلیسی و دادگەهێ بکەن، دا کو کێشەیێن وان ب رێکا یاسایی بهێنە چارەسەرکرن و تاوانبار سزایێ خۆ وەرگرن.”
شارەزا ئاماژێ ب هندێ دکەن کو زێدەبوونا ڤان دۆسیەیان نیشانا هندێ یە کو جڤاک پێدڤی ب هۆشیارییەکا دیجیتاڵی یا زێدەتر هەیە. هەرچەندە تەکنەلۆژیا بۆ ئاسانکاریا ژیانێ یە، لێ د دەستێ هندەک کەسان دا بوویە ئەگەرێ تێکدانا شیرازەیا خێزانێ، کو تەنێ ب سەروەرییا یاسایێ و بلندکرنا ئاستێ هۆشیاریێ دهێتە کۆنترۆڵکرن.
