ل گۆرەیی راپۆرتەکێ، فرەنسا رۆلەکێ ئەرێنی و کاریگەر گێرایە د پرسا رێککەفتنا دناڤبەرا هێزێن سووریا دیمۆکرات (هەسەدە) و حکومەتا دیمەشقێ دا، ب جۆرەکی کو پتر پشتەڤانییا کوردان کریە، بەروڤاژی ئەمریکا کو پتر پشتەڤانییا شەرعی دکر. ئەڤ بزاڤا دیپلۆماسی یا فرەنسا، کو ئیمانوێل ماکرۆن سەرۆکێ فرەنسا رۆلەکێ سەرەکی تێدا گێرایە، ب تایبەتی ل گەل سەرۆک نێچیرڤان بارزانی، ئەنجامێن گرنگ بۆ کوردان ل سووریێ هەبووینە.
دابەشکرنا ئەرکان دناڤبەرا واشنتۆن و پاریسێ دا
ژێدەرێن دیپلۆماسی یێن فرەنسی بۆ مالپەرێ مۆنیتەر یێ ئەمریکی ئاشکرا کریە کو جۆرەک ژ دابەشکرنا ئەرکان دناڤبەرا ئەمریکا و فرەنسا دا هەبوویە. واشنتۆن سەرنجا خۆ ل سەر بهێزکرنا پێگەهێ ئەحمەد شەرع وەک سەرۆکێ دەولەتێ و کۆنترۆلکرنا زیندانێن داعشێ و کەمپان کریە. ل بەرامبەر، پاریسێ رۆلێ “پشتەڤانی و دارشتنا مافان” گێرایە، ب تایبەتی ل سەر چەسپاندنا مافێن مەدەنی، زمانێ کوردی، رێڤەبەرییا خۆجهی و نوینەراتیا کوردان د ناڤ دەستهەلاتێ دا.
دەستکەفتیێن سیاسی یێن کوردان ب هەڤکاریا فرەنسا
ب گۆرەیی گۆتنا بەرپرسێن دیپلۆماسی، رێککەفتن بتنێ تێکەلکرنا شەرڤانان د ناڤ سوپای دا نینە، بەلکو فرەنسا شیا چەند خالێن گرنگ بسەلمینیت کو د رەشنڤیسێن دەستپێکێ دا نەبوون. ژ گرنگترین وان دەستکەفتییان ئەڤەنە: مافێن مەدەنی و پەروەردەیی: رێککەفتن گەرەنتییا مافێن مەدەنی و پەروەردەیی یێن گەلێ کورد دکەت.
ڤەگەریانا ئاوارەیان: گەرەنتییا ڤەگەریانا ئاوارەیان بۆ جهـ و وارێن وان بێ چو فشارەکێ. پۆستێن بلند: بریار هاتییە دان کو بەرپرسێن کورد د پۆستێن بلند یێن پارێزگەهێن وەک حەسەکێ و پۆستێن وەزاری دا بهێنە دانان.
دەستوورێ نوی: پاریس گەشبینە کو دیمەشق رێ بدەت نوینەرێن کورد و هەسەدێ پشکدارییێ د وێ لیژنەیێ دا بکەن یا کو دەستوورێ نوی یێ وەلاتی دنڤیسیت.
هەڤپەیمانییەکا دیرۆکی: ژ میتەران هەتا ماکرۆن
پشتەڤانییا فرەنسا بۆ کوردان دیرۆکییە و دەمکی نینە. ل سالا 1983، پەیمانگەها کوردی ل پاریس هاتە دامەزراندن. ل سالا 1991، فرەنسا پالدەرا سەرەکی یا بریارا 688 یا جڤاتا ئاسایشێ بوو بۆ پاراستنا کوردێن هەرێما کوردستانێ، و دانیال میتەران ب “دایکا کوردان” هاتە نیاسین. د سەردەمێ نوی دا، ل سالا 2014 فرەنسا ئێکەم وەلات بوو چەک بۆ پێشمەرگەیی هنارتی. سەرۆک ماکرۆنی ژی ئەڤ میراتە بەردەوامی پێدایە، ب کۆمبوونێن بەردەوام ل گەل سەرۆک بارزانی، سەرۆک نێچیرڤان بارزانی و مەسروور بارزانی د سالێن 2023 و 2024ێ دا.
کەریم قەمەر، نوینەرێ رێڤەبەرییا خۆسەر ل فرەنسا، سوپاسییا ترەمپی بۆ رێککەفتنێ کر، لێ دیار کر کو واشنتۆن پتر ئالیگرێ شەرعی بوویە. ل بەرامبەر، فرەنسا هەردەم ل گەل کوردان بوویە و داخواز ژ سەرۆک ماکرۆن کر کو ل سەر پاراستنا گەلێ کورد ل سووریێ بەردەوام بیت. فرەنسا تەکەزییێ ل سەر وێ چەندێ دکەت کو پرۆسەیا ڤەگوهاستنا زیندانییان و کۆنترۆلکرنا کەمپان ب جۆرەکی بیت کو مەترسییێ ل سەر ئاسایشا ئەورۆپا دروست نەکەت، ب تایبەتی کو پتر ژ 1,300 وەلاتییێن فرەنسی چوونە دناڤ داعشێ دا.
