شیانا وێستگەها سەرەکیا نەفتێ ل کەرکووکێ دێ هێتە زێدەکرن کو ل وێرێ نەفت ب رێکا بۆریا هەرێما کوردستانێ دهێتە هنارتن و ژ ئەڤرۆ و پێدا 90 هزار بەرمیلێن دی ژ کێلگەهێن ناڤەراست و باشووری بۆ وێ وێستگەهێ دێ هێنە ڤەگوهاستن دا کو دگەل 250 هزار بەرمیلێن نەفتا کەرکووکێ رۆژانە بۆ بەندەرێ جەیهان بهێنە هنارتن
ئەو رێکارێن نوی ژ لایێ کۆمپانیا نەفتا باکوور ڤە ل 5ێ نیسانێ ل وێستگەها کەی وەن هاتینە تەمامکرن و تاقیکرن کو ئەو ژی زێدەکرنا پەمپێن پالدانا نەفتێ بوو
ل دویڤ زانیاریێن رووداو ژ کۆمپانیا نەفتا باکوور وەرگرتین بەری نوکە ژبەر کۆنبوونا پەمپێن وێستگەها کەی وەن شیانا پالدانا نەفتێ وەک پێدڤی نەبوو و بڕیارە ژ ئەڤرۆ و پێدا ژ کێلگەهێن ناڤەراست و باشوورێ عێراقێ رۆژانە 90 هزار بەرمیلێن نەفتێ بۆ وێ وێستگەهێ بهێنە ڤەگوهاستن دا کو ل وێرێ بهێنە هنارتن
وێستگەها کەی وەن زێدەباری پەمپێن پالدانێ کۆگەه ژی لێ هەنە کو شیانا کۆمکرنا نێزیکی سێ ملیۆن بەرمیلێن نەفتێ هەیە کو نوکە نەفتا بەرهەمهاتیا کێلگەهێن بای حەسەن خەباز جەمبوور و کەرکووکێ بۆ دهێتە ڤەگوهاستن و پاشان ب رێکا بۆریا هەرێما کوردستانێ بۆ بەندەرێ جەیهان یێ تورکیا دهێتە رەوانەکرن
بەرپرسەکێ کۆمپانیا نەفتا باکوور بۆ تۆرەیا میدیایی یا رووداو راگەهاند ئەو پێنگاڤە بۆ هندێ یە کو هنارتنا نەفتا کەرکووکێ ب رێکا بۆریا هەرێما کوردستانێ بۆ تورکیا زێدەتر لێ بهێت کو نوکە رۆژانە 250 هزار بەرمیلێن نەفتێ نە و بڕیارە 90 هزارێن دی لێ زێدە ببن
پەنابرنا وەزارەتا نەفتا فیدراڵ بۆ بۆریا ڤەگوهاستنا نەفتا هەرێما کوردستانێ پشتی هندێ هات کو ل 28ێ شوباتێ ڤە ژبەر شەڕێ ئیرانێ دگەل ئەمریکا و ئیسرائیلێ هنارتنا نەفتا عێراقێ ب رێکا بەندەرێن بەسرە راوەستیا و ل 18ێ ئادارێ هنارتنا نەفتا کەرکووکێ ب رێکا هەرێما کوردستانێ دەستپێکرەڤە
عامر خەلیل رێڤەبەرێ گشتی یێ کۆمپانیا نەفتا باکوور بۆ میدیایا فەرمی یا عێراقێ راگەهاند ئەو چاکسازییە دێ وەکەت شیانا پالدانا کۆگەها کەی وەن ژ 45 هزار بەرمیلان ببیتە 90 هزار و ئەو نەفتا بۆ کۆگەهێ دهێت دێ بۆ تورکیا هێتە هنارتن
شیانا بەرهەمهێنانا رۆژانە یا چار کێلگەهێن کەرکووکێ زێدەتر ژ 300 هزار بەرمیلێن نەفتێ نە کو نێزیکی 60 هزار بەرمیل بۆ پالاوگەها بێجی دهێنە رەوانەکرن و 10 بۆ 15 هزار بەرمیل ژی ب تەنکەران بۆ ئۆردن دهێنە هنارتن
ژێدەرێ رووداو ل کۆمپانیا نەفتا باکوور گۆت ژ دووشەمبی ڤە کۆگەها کەی وەن دێ ئامادە بیت بۆ وەرگرتنا وان 90 هزار بەرمیلان کو چاڤەڕێ دهێتە کرن رۆژانە ب رێکا 400 بۆ 450 تەنکەران بۆ بهێنە ڤەگوهاستن
عێراق رۆژانە پێدڤی ب هنارتنا 3.5 ملیۆن بەرمیلێن نەفتێ یە دا کو تێچوویێن خۆ دابین بکەت و نوکە عێراق زێدەباری رێکا تورکیا ب تەنکەران نەفتێ ب رێکا سووریا ژی دهنێریت