بادینان دەیلی:
مێرخاس دۆسکی، ستێرا کوردی یا هەلبژارتیێ عێراقێ د نووترین داخویانی دا راگەهاند، کو وان ئامادەکاریێن زۆر باش بۆ یارییا چارەنڤیسساز بەرامبەر بۆلیڤیایێ کرینە و گۆت: “ئەڤ سەرکەفتنە دێ گەلەک تشتان ل وڵاتێ مە گوهۆڕیت.”
مێرخاس دۆسکی نوکە ل مەکسیک ل گەل هەلبژارتیێ عێراقێ خۆ بۆ یارییا “لۆتکە” بەرامبەر بۆلیڤیایێ ئامادە دکەت، کو بڕیارە رۆژا چارشەمبی دەمژمێر 06:00ی سپێدێ بهێتە ئەنجامدان. هەر هەلبژارتیەکێ د ڤێ یاریێ دا ب سەرکەڤیت، دێ بیتە دووماهیک تیپ کو دگەهیتە مۆندیالا 2026ێ.
بەرێ ڤێ یارییا مێژوویی، دۆسکی بۆ مالپەرێ فەرمی یێ (فیفا) ئاخفت و بەحسێ خەونا 40 سالە یا عێراقییان کر و گۆت: “گەلێ عێراقێ حەزەکا شێتانە بۆ تەپا پێی هەیە و چوار دەهەییە چاڤەڕێی ڤێ گاڤێ دکەن. دووماهیک جار عێراق ل سالا 1986ێ ل مۆندیالێ هاتیە دیتن، ئەو دەمێ ئەحمەد رازی و حوسێن سەعید یاری دکر. وڵاتێ مە د ناخۆشیێن زۆر دا دەرباز بوویە، ئێستا تو دشێی ببینى کا خەلک چەند ب پەرۆشن بۆ ڤێ یاریێ.”
ئەڤی بەرگریکارێ هەلبژارتیێ عێراقێ ئاماژە ب وێ چەندێ ژی کر کو میدیایێن جیهانی وێنەیەکێ خەلەت ل سەر عێراقێ نیشان داینە، چونکی عێراق وڵاتەکێ جوانە و خەلکەکێ مێواندۆست و دلۆڤان یێ هەی، و گۆت: “ئەم دڤێین نیشان بدەین کو عێراق ڤەگەڕیایە سەر شانۆیێ مەزن و ناڤێ خۆ د مێژوویێ دا تۆمار بکەین.”
مێرخاس دۆسکی کو دایک و بابێن وی خەلکێ باژێرێ زاخۆ نە، د بەشەکێ دی یێ ئاخفتنێن خۆ دا بەحسێ پەیوەندیا خۆ یا بهێز ل گەل یاریزان “ئەمیر عەماری” کر و ب تشتەکێ پتر ژ ئەرکێ نیشتمانی وەسف کر. ئەو هەردو د کەمپێن هەلبژارتی دا د ئێک ژوور دا دمینن و ژوورا وان ب “پاقژترین ژوور” دهێتە ناسین، هەر چەندە ئەمیر عەماری ب گاڵتەڤە د کاتی هەڤپەیڤینێ دا گۆتبوو مێرخاسی کو ژوور یا شێلایە و پێدڤی ب پاقژکرنێ یە.
دۆسکی زێدەتر گۆت: “ئەم فێری وێ چەندێ بووینە کا دێ چەوا سەرەدەریێ ل گەل بارودۆخێن سەخت کەین. ئەز چو نێگەران نینم، بتنێ 90 خولەک ل پێشیا مە ماینە، دڤێت ئەوێن ل و لایێ یاریگەهێ (بۆلیڤیا) ژ مە بترسن، نەک ئەم ژ وان.”
ئەگەر عێراق بشێت ل بۆلیڤیایێ ببەت، دێ ب فەرمی گەهیتە مۆندیالێ و کەڤیتە کۆمەلا نۆیێ ل گەل هەلبژارتیێن (فەڕەنسا، نەرویج و سەنیگال). مێرخاس د دووماهیێ دا گۆت: “ئەڤە خەونا هەر زارۆکەکێ یە کو ل سەر جاددەیان یاری کربیت، ئەز دێ ب هەمی شیانێن خۆ یاریێ کەم بۆ دڵخۆشکرنا خێزانا خۆ و 46 ملیۆن عێراقییان.”
بادینان دەیلی – پشکا وەرزشی