زێدەتر ژ 3200 پێشمەرگەیێن کێمئەندام مووچەیێ مەها دە یا سالا بۆری وەرنەگرتیە و زێدەتر ژ 800 ئەندامێن دی ژی ژ مەها دە ڤە چو مووچە وەرنەگرتینە بەرپرسەکێ کۆمەڵەیا پێشمەرگەیێن کێمئەندامێن سەنگەری دبێژیت ئەڤ مەهە هەمی دێ مووچەیێ مەهەکێ وەرگرن
نەسرەدین محەمەد جێگرێ سکرتێرێ کۆمەڵەیا پێشمەرگەیێن کێمئەندامێن سەنگەری ئەڤرۆ ئێکشەمبی بۆ تۆرەیا میدیایی یا رووداو راگەهاند کو هەتا ئەڤرۆ 3287 ئەندامێن مە کو دۆسیەیێن وان تەمام بووینە مووچەیێ مەها دە وەرنەگرتیە بەلێ مووچەیێ مەهێن ئێک و دو بۆ وان هاتیە مەزاختن و وەرگرتیە
جێگرێ سکرتێرێ کۆمەڵەیا پێشمەرگەیێن کێمئەندامێن سەنگەری گۆت پەیمان هاتیە دان مووچەیێ مەها دە بۆ مە بهێتە دان بەلێ نە دگەل مووچەیێ مەها سێ بەلکو د مەهێن داهاتی دا و هندەک جاران ژی دبێژن بەغدا مەزاختنێ ناکەت هەتا بودجەیا نوی نەهێتە پەسەند کرن
نەسرەدین محەمەد ئاماژە ب کێشەیا پشکەکا دی یا پێشمەرگەیێن کێمئەندام کر و گۆت نێزیکی 800 ئەندامێن مە ماینە هەتا ئەڤرۆ ب سەدەمێ هندێ کو دۆسیەیێن وان نەهاتینە ئێخستنە سەر وەزارەتا دارایی و درەنگ کەفتینە چو مووچە ژ مەها دە یا سالا بۆری ڤە وەرنەگرتینە
ئەگەرێ سەرەکی یێ پاشکەفتنا مووچەیێ پێشمەرگەیێن کێمئەندام ئەوە کو نێزیکی 9 هزار کەسن و ل یەکەیێن 70 و 80 یێن پێشمەرگەی دۆسیەیێن وان بۆ سەر وەزارەتا دارایی هاتینە ڤەگوهاستن و مامەلەیێن وان درەنگ کەفتینە
جێگرێ سکرتێری دیار کر کو بڕیارە ئەڤ مەهە ئەو 800 کەسە مووچەیێ مەهەکێ وەرگرن و مووچەیێن وان یێن رابردوو هێشتا دیار نینە کێ دێ هێنە مەزاختن و گۆت ئەم بەردەوام دگەل بەرپرسێن دارایی ل هەرێمێ و عێراقێ د هێلێ دا نە بۆ وەرگرتنا مافێن ئەندامێن خۆ
وەزارەتا دارایی و ئابووری یا هەرێما کوردستانێ ل 12ێ ئادارێ د راگەهاندنەکێ دا دیار کر کو زێدەکرنا ناڤێ فەرمانبەر یان خانەنشین یان هەر مووچەخۆرەکێ د لیستا مووچەی یا مەهانە دا پەیوەندی ب وەزارەتا دارایی ڤە نینە بەلکو ئەو رێکار پەیوەندی ب وەزارەت و یەکەیێن ژمێریاری یێن دەرڤەی وەزارەتێ ڤە هەیە
وەزارەتا دارایی راگەهاند کو ئەو خانەنشینێن ناڤێ وان د لیستا مەها شوباتێ دا نەبووی 801 کەسن و کێمئەندامێن سەنگەرن کو بەری نوکە ل سەر هێزێن 70 مووچە وەرگرتیە و ژبەر تەمام نەبوونا دۆسیەیێن وان ل وەزارەتا پێشمەرگەی نەهاتبوونە رەوانە کرن بۆ دارایی لەوما د لیستا مەها شوباتێ دا نەبوون
هەروەسا دیار کر کو پشتی هووربینیا لژنەیەکا تایبەت دۆسیەیێن 750 خانەنشینان هاتنە پەسەند کرن و د لیستا مەها ئادارێ دا ناڤێن وان هاتنە تۆمار کرن و مووچە بۆ وان هاتە بەستن و وەزارەتا دارایی یا فیدراڵ پشتراستی دایە کو ئەو مووچەیێن نەهاتینە دان وەک ماف دێ مینن هەتا بودجە دهێتە پەسەند کرن و پاشان دێ هەمی پێکڤە هێنە مەزاختن