هەتا نوکە 245 قوتابیێن ئیرانی ژبەر شەڕی هاتینە کوشتن

بەرپرسێ پەیوەندیێن گشتی یێن وەزارەتا پەروەردەیا کۆمارا ئیسلامیا ئیرانێ دوماهی ئامارێن قوتابیێن قوربانیێن شەڕی و وان ناڤەندێن خواندنێ یێن کو ژبەر هێرشان زیان گەهشتیێ بەلاڤکرن و دبێژیت 57.5% ژ قوربانییان کورتن و 42.5% کچن

حوسێن سادقی بەرپرسێ پەیوەندیێن گشتی یێن وەزارەتا پەروەردەیا ئیرانێ بۆ ئاژانسا ئیسنا راگەهاند کو د ماوێ 37 رۆژێن شەڕێ هەڤبەشێ ئەمریکا و ئیسرائیلێ دژی ئیرانێ 245 قوتابی ژبەر هێرشان هاتینە کوشتن کو 136 قوتابیێن کورتن و 102 قوتابیێن کچن هەروەسا ئاماژە ب وێ چەندێ دا کو حەفت فێرخوازێن نوی یێن پۆلا ئێکێ ژی هاتینە کوشتن کو پێنج کورتن و دوو کچن

ب گۆتنا سادقی ژ دەستپێکا شەڕی و هەتا ئەڤرۆ دووشەمبی 6ێ نیسانا 2026ان 11 کارمەندێن پیاو و 38 کارمەندێن ئافرەت یێن کەرتێ پەروەردێ د هێرشێن ئیسرائیلێ و ئەمریکادا هاتینە کوشتن هەروەسا شەش پیاو و سێ ئافرەتێن خانەنشین ژی هەر ژبەر هێرشان گیانێ خۆ ژ دەست دایە

دەربارەی زیانێن گیانی بەرپرسێ وەزارەتا پەروەردێ دیار کر کو 178 قوتابی و 24 کارمەندێن کەرتێ پەروەردێ بریندار بووینە

حوسێن سادقی دیار کر ژبەر شەڕی 764 ناڤەندێن پەروەردە و فێرکرنێ دگەل 51 ناڤەندێن کارگێری و 15 ناڤەندێن رەوشەنبیری و 23 هۆلێن وەرزشی و 7 کەمپێن چالاکیێن قوتابخانەیان زیان گەهشتیێ

هەروەسا گۆت د 37 رۆژێن شەڕی دا 51 قوتابخانە وێران بووینە و 713 ئاڤاهیێن دی یێن قوتابخانەیان ژی زیان گەهشتیێ کو زۆربەیا وان ل باژێرێن تاران و کرماشانێ نە