تەلەڤزیۆنا فەرمی یا ئیرانێ جەخت ل سەر وێ یەکێ کر کو د یاداشتنامەیا لێکگەهشتنێ دا کو ل سەر دهێتە ئاخفتن هاتییە کو د ماوێ ٦٠ رۆژان دا ١٢ ملیار دۆلار ژ پارەیێن ئیرانێ یێن بلۆککری بهێنە ئازادکرن داکو ئیران بشێت ل هەر بانکەکا بڤێت بکاربینیت بێی چ سنووردارکرن
ل ئالیێ دی کۆچکا سپی راپۆرتەکا تەلەڤزیۆنا ئیرانێ رەت کر کو بەحس ل هەبوونا رەشنووسێ رێککەفتنەکێ دکر بۆ هەلگرتنا گەمارۆیا دەریایی و دۆناڵد ترەمپ سەرۆکێ ئەمریکا ژی راگەهاند کو چ ئالوگۆڕێن پارەی نابن هەتا کاتەکێ نادیار
پرسا پارەیێن ئیرانێ یێن بلۆککری ئێکە ژ خالێن سەرەکی یێن دانوستاندنێن نها بۆ ب دوماهی ئینانا شەڕی ل رۆژهەڵاتا ناڤەڕاست و ئاژانسا ئیسنا یا ئیرانی ژی دیار کر کو تاران هەول ددەت ٢٤ ملیار دۆلاران دەستکەڤیت ب مەرجەکێ کو نیڤا وی پارەی هەر دگەل راگەهاندنا لێکگەهشتنێ بهێتە دان
راپۆرتێن میدیایی یێن ئیرانی ئاماژە ب وێ یەکێ دکەن کو کۆژمێ پارەیێن ئیرانێ یێن بلۆککری ل دەرڤە د ناڤبەرا ١٠٠ بۆ ١٢٣ ملیار دۆلاران دانە و تاران داخوازا میکانیزمەکێ روون دکەت بۆ گەرەنتیا ئازادکرنا پارەیێن دی
دەربارەی گەروویا هورمز ئیرانێ ب فەرمی ئەو گەروویە داخستییە و راگەهاندییە کو ئیران ب تەنێ دەسەڵاتە بۆ دیارکرنا سروشتێ وان کەشتیێن تێپەڕ دبن و هەر کەشتیەکا بارێ وێ ب مەترسی بهێتە دیتن یان لایەنێ وێ دوژمنێ ئیرانێ بیت رێ پێ ناهێتە دان دەرباز ببیت
