بادینان دەیلی
ئەڤرۆ دوشەمبی فڕۆکەکا هێلا ئاسمانی یا تورکیش ئێرلاین ل دەمێ نیشتنێ دا ل فڕۆکەخانەیا سەرەکیا وڵاتێ نیپاڵ ئاگر گرت و ئەڤ چەندە بوو ئەگەرێ گرتنا فڕۆکەخانەیێ لێ خوشبەختانە چ بریندار لێ نەکەفتنە ڤە
ئەو گەشتە ژ باژێرێ ئەستەنبووڵ یێ تورکیا هاتبوو و فڕۆکە ل فڕۆکەخانەیا نێڤدەوڵەتیا تریبوفان ل کاتماندۆ نیشتە خوار لێ بەری سەرنشین دابەزن ئاگر بەربوو فڕۆکێ و ب ناچاری سەرنشین ب دەرگەهێن خزمەتگوزاریێ هاتنە خار
ب گۆرەی ئاخفتنا بەرپرسێن فڕۆکەخانەیێ تیمێن هەوارچوونێ گەهشتنە جهێ ڕووداوێ و ئاگر کۆنترۆڵ کرن و سەرنشین ب سەلامەتی هاتنە ڤەگوهاستن و د ناڤ وێ فڕۆکێ دا کو ژ جۆرێ ئەیرباس 330 بوو 277 سەرنشین هەبوون
ئەڤرۆ سپێدێ فڕۆکەخانە ب ئێکجاری هاتە گرتن و چەندین گەشتێن دی یێن کو بەرەو کاتماندۆ دهاتن هاتنە ڕاگرتن هەتا کو لایەنێن پەیوەندیدار ڕێڕەوێ فڕۆکەخانەیێ پاقژ دکەن و لێکۆڵینەڤێ د ڕووداوێ دا دکەن
وڵاتێ نیپاڵ ب وێ چەندێ یێ نیاسە کو ڕووداوێن فڕۆکان لێ زۆر دبن ژبەر کو ناوچەیەکا چیایە و سەقایێ وێ یێ جێگیر نینە و ئەڤە ژی کارێ فڕینێ گەلەک زەحمەت دکەت
ل سالا 2015 ژی فڕۆکەکا دی یا تورکیش ئێرلاین ل دەمێ نیشتنێ دا ل فڕۆکەخانەیا کاتماندۆ ژ ڕێڕەوی دەرکەفتبوو و ئەڤ چەندە ببوو ئەگەرێ گرتنا فڕۆکەخانەیێ بۆ چەند ڕۆژان لێ د وێ ڕووداوێ دا ژی کەس بریندار نەببوو و دووماهیێ ئەو فڕۆکە کرە مۆزەخانە