سۆمۆ داخوازا خشتەیێ بارکرنا نەفتێ ژ کۆمپانیا یان دکەت

کۆمپانیا بەبازاڕکرنا نەفتێ یا عێراقێ سۆمۆ داخوازێ ژ کۆمپانیایێن کڕیارێن نەفتێ دکەت د ناڤ 24 دەمژمێران دا خشتەیێ بارکرنا نەفتا هنارتیا عێراقێ ل بەندەرێن باشووری بنێرن و پێ راگەهاندینە کو بەندەرێن بەسرە ب تەمامی کارا بووینە

کۆمپانیایێ ل 5ێ نیسانا 2026 دوو نووسراوێن جودا بۆ نەفتا خاڤ و نەفتا رەش ئاراستەی کۆمپانیایێن کڕیارێن وان هەردوو جۆرێن نەفتێ کرینە و کۆپیەکا هەر دوو نووسراوان گەهشتیە دەستێ رووداو

ل دویڤ نووسراوان کۆمپانیا سۆمۆ ئەو چەندە پشتراست کریە کو تەنگاڤا هورمز بۆ ڤەگوهاستنا نەفتا عێراقێ ڤەکریە

سۆمۆ دوو نووسراوێن بەلەز رەوانەی کڕیارێن نەفتا خاڤ و نەفتا رەش کرینە و پشتراست کریە کو هەمی بەندەر و تەنگاڤ ب تەمامی کارانە و ئامادەنە بۆ ڤەگوهاستنێ

ئەو پێنگاڤە پشتی رۆژەکێ هات ژ بڕیارا رێپێدانا کۆمارا ئیسلامیا ئیرانێ بۆ دەربازبوونا کەشتیێن ڤەگوهاستنا نەفتا عێراقێ ژ تەنگاڤا هورمز ڤە

سۆمۆ کۆمپانیایێن کڕیارێن نەفتا عێراقێ ئاگەهدار کرینە کو د ناڤ 24 دەمژمێران دا خشتەیێ بارکرنا وێ نەفتێ بۆ بنێرن کو بەری نوکە گرێبەستا کڕینێ دگەل عێراقێ ئیمزا کرینە

عاسیم جیهاد شارەزایێ بواری وزەیێ و پەیڤدارێ بەری یێ وەزارەتا نەفتا عێراقێ بۆ تۆرەیا میدیایی یا رووداو راگەهاند کو دوماهی بارکرنا نەفتا عێراقێ ل بەندەرێن بەسرە ل 3ێ ئادارێ بوو کو پێنج کەشتیێن نەفتێ بارکرینە و پشتی وێ ژبەر راوەستیانا هنارتنا نەفتێ چو کەشتیێن دی نەبووینە کو نەفتێ بار بکەن

ژ 28ێ شوباتێ ڤە شەڕێ ئیرانێ دگەل ئەمریکا و ئیسرائیلێ دەستپێکر و ژ وی دەمی ڤە ئیرانێ تەنگاڤا هورمز ل بەرامبەر هاتنوچوونا کەشتیان گرتبوو

ب گۆتنا عاسیم جیهاد ئەو نەفتا ژ ئەڤرۆ و پێدا دهێتە بارکرن ئەوە یا کو بەری شەڕی هاتیە فرۆتن بەلێ ژبەر رەوشا دەڤەرێ کەشتیێن کۆمپانیایان نەشیاینە بگەهنە بەندەرێن عێراقێ و نەفتێ بار بکەن

هنارتنا نەفتا عێراقێ ژ 3.4 ملیۆن بەرمیلان کێم بوویە بۆ 250 هزار بەرمیلان کو ب رێکا بۆریا هەرێما کوردستانێ بۆ بەندەرێ جەیهان یێ تورکیا دهێتە هنارتن

عاسیم جیهاد پێشبینی دکەت کو هندەک کۆمپانیا دوودل بن د کڕینا نەفتا عێراقێ دا بۆ ڤێ قۆناغێ ژبەر رەوشا شەڕی ل دەڤەرێ زێدەباری هندێ کو ژبەر بلندبوونا بهایێ بیمەیا کەشتیان ل کەنداڤی بهایێ نەفتا هنارتی ژی دێ بلند بیت