بادینان دەیلی
رێكخراوا خۆراك و كشتوكاڵێ یا نەتەوە یەكگرتووەكان (فاو) راگەهاند، شهڕێ ئیرانێ و ئالۆزیێن رۆژهەلاتا ناڤین بووینە ئەگەرێ بلندبوونا بهایێ كەرەستەیێن خوارنێ ل جیهانێ. ئەڤە ژی بۆ زێدەبوونا تێچوویێ وزێ و پەینێ كشتوكاڵی ڤەدگەریت.
بلندبوونا بهايان
رۆژا ئەینی (٣ی نیسانا ٢٠٢٦)، رێكخراوا فاو د راپۆرتەکێ دا ئاشكرا كر كو پێوەری نرخێ خوارنێ د مەها ئادارێ دا ب رێژەیا ٢.٤٪ بلند بوویە هەڤبەر ب مەها شوباتێ. ئەڤە دووەم بلندبوونا ل دویڤ ئێکە و ئەگەرێ سەرەکی ژی بۆ بلندبوونا بهایێ وزێ دزڤریت کو ژبەر شەڕێ ئیرانێ دروست بوویە.
کارتێکرنا داخستنا تەنگا هورمز
پشتی دەسپێكرنا شەڕی ل ٢٨ێ شوباتێ، ئیرانێ تەنگا هورمز داخست، کو پێشتر ٢٠٪ێ یا نەفتا جیهانێ و ٣٠٪ێ یا پەینێ كشتوكاڵی پێدا دهاتە رەوانەكرن. ژبەر ڤێ یەکێ بهایێ پەینێ کشتوکالێ نێزیکی ٣٠٪ بلند بوویە. هەروەسا بهایێ رۆنێ رووەکی ژی ب رێژەیا ٥.١٪ زێدە بوویە، ب تایبەت رۆنێ پالم (خورمایێ) کو گەهشتیە بلندترین ئاست ژ سالا ٢٠٢٢ێ وەرە.
هۆشداریێن مەترسیدار
ماكسیمۆ تۆرێرۆ، گەورە ئابووریناسێ فاو هۆشداری دا و گۆت: “ئەگەر شەڕ پتر ژ ٤٠ رۆژان بخایەنیت و بهایێ پەینی هەر ب بلندی بمینیت، جوتیار دێ نەچار بن کێمتر بچینن، ئەڤە ژی دێ ئاساییشا خوارنێ بۆ ئەڤ سالە و سالا بهێت کەتە د مەترسیەکا مەزن دا.”
راپۆرتێ ئاماژە ب وێ یەکێ ژی کریە کو تێکچوونا رێڕەوێن گەهاندنێ، گومانیەکا مەزن ل سەر پاشەرۆژا بەرهەمێ گەنم و گەنمەشامی ل جیهانێ دروست کریە.