بادینان دەیلی:
ب شێوەیەکێ فەرمی بڕیار ل سەر یارییا د ناڤبەرا هەردوو یانەیێن هەولێر و زەورا دا هاتە دان و یاری دێ بێ ئامادەبوونا هاندەران بڕێڤە چیت.
بڕیارە ئەڤرۆ ئێڤاری ل دەمژمێر ١٥:٠٠ (٣ی پشتی نیڤرۆ)، ل یاریگەها شەهید “فرانسۆ هەریری” ل باژارێ هەولێرێ، هەردوو یانە ل سەر پلەیێن پێشیێ یێن خولێ هەڤرکیێ بکەن.
هەرچەندە ل دەستپێکێ بڕیار بوو جەماوەر ئامادە بن و پشتەڤانیا یانەیا هەولێر بکەن، بەلێ پارێزگەها هەولێرێ بڕیارا خۆ گوهۆڕی و راگەهاند کو یاری دێ بێ هاندەر بیت.
دەقێ راگەهاندنا ژوورا ئۆپەراسیۆنا پارێزگەها هەولێرێ:
بۆ هەمی وەرزشڤان و هاندەرێن هێژا یێن یانەیا وەرزشی یا هەولێرێ، ئەم هەوە ئاگەهدار دکەین:
“سەبارەت ب یارییا د ناڤبەرا هەردوو یانەیێن (هەولێر و زەورا) کو ئەڤرۆ سێشەمبی ٣١ـی ئادارا ٢٠٢٦ێ ل یاریگەها شەهید فرانسۆ هەریری دهێتە ئەنجامدان؛ پشتی کو ل سەر داخوازا جەماوەری بڕیار هاتبوو دان یاری ب ئامادەبوونا هاندەران بیت، بەلێ ژبەر وی بارودۆخێ ئەمنی یێ روو ب روویێ باژارێ مە بووی، کو هەر ئەڤرۆ سپێدێ چەندین درۆنێن تیرۆرستان ل ئاسمانی هاتنە تەقاندن، مە بڕیار دا ب:
ئەنجامدانا یارییا د ناڤبەرا (یانەیا هەولێر و یانەیا زەورا) بێ ئامادەبوونا جەماوەری بڕێڤە بچیت.
ئەڤ بڕیارە تنێ بۆ پاراستنا گیانێ هاندەرێن خۆشتەڤی و هاولاتیێن باژارێ مە یە، کو ل دەڤ مە ژ هەمی دەستکەفتێن ماددی و وەرزشی ب نرخترە. ئەم دزانین هاندەر یێ تێنیێ دیتنا یاریێ نە و یانە ژی ژ روویێ دارایی ڤە دێ زیانمەند بیت، بەلێ پاراستنا هەوە ل سەرووی هەمی تشتەکی یە.
دووبارە داخوازییا لێبۆرینێ ل هاندەرێن دلسۆز یێن یانەیا باژارێ مە دکەین، کو هوین هەر دەم داینەمۆیێ سەرکەفتنێن یانەیێ نە.”
ژوورا ئۆپەراسیۆنا پارێزگەها هەولێرێ
ژێدەر: بادینان دەیلی