بادینان دەیلی:
بهایێ زێڕی د بازاڕێن جیهانی دا بلندبوونەکا رێژەیی تۆمار کر، ئەڤ بلندبوونە ژی هەڤدەمە ل گەل دابەزینا بهایێ دۆلاری. لێ شارەزا دبێژن بلندبوونا بهایێ وزێ و مەترسیێن هەڵاوسانێ ژ ئەگەرێ ئالۆزیێن سەربازی یێن دەڤەرێ، بووینە رێگر کو بهایێ ڤی کانزایێ زەرد پتر بلند نەبیت.
ئەڤرۆ دوشەمبی، 30ی ئادارا 2026، ئاژانسا “رۆیتەرز” بەلاڤکر کو ل دەمژمێر 03:30ی سپێدێ، بهایێ زێڕی د مامەلەیێن بلەز دا ب رێژەیا 0.3% بلند بوو و گەهشتە (4505.86) دۆلاران بۆ هەر ئۆنسەیەکێ. هەروەسا گرێبەستێن پاشەرۆژی یێن ئەمریکا بۆ مەها نیسانێ ژی ب هەمان رێژە بلند بوون و گەهشتنە (4535.80) دۆلاران.
دابەزینا بهایێ دۆلاری وایکر کو ئەو کەلوپەلێن ب دۆلاری دهێنە خەملاندن (وەک زێڕی) بۆ خودان دراوێن دی ئەرزانتر بکەڤن. نیکۆلاس فرابڵ، رێڤەبەرێ جیهانی یێ بازاڕێن سازیان ل (ABC Refinery) راگەهاند: “لڤینا بهایێ زێڕی د حەفتیا دەربازبووی دا نیشانا پەرچەکردارەکێ بوو بەرامبەر دۆخێ فرۆشتنا زۆر، ئەگەرێ گوهۆڕینا ئاراستەیێ دابەزینێ یێ هەی، لێ دڤێت ئەڤ چەندە د ڤێ حەفتیێ دا ب دروستی بهێتە پشتڕاستکرن.”
هەڤدەم، بهایێ پەترۆلا خاڤ یا برێنت بۆ زێدەتر ژ (115) دۆلاران بۆ هەر بەرمیلەکێ بلند بوو، پشتی کو ل دووماهیا حەفتیا دەربازبووی حووسیێن یەمەنێ هێرشی سەر ئسرائیل کری. ئەڤێ چەندێ مەیدانا شەڕی بەرفرەهتر کر و کێشەیێن هەڵاوسانێ زێدەتر کرن. ب تنێ د مەها ئادارێ دا، بهایێ پەترۆلێ ب رێژەیا 60% بلند بوویە کو ئەڤە ژی ریکۆردەکا مێژوویی یا هەیڤانە یە.
وەبەرهێنەر پێی وایە هەلا کێمکرنا “سوودا بانکی” ل ئەمریکا بۆ ئەڤ سالە کێم بوویە، چونکی بلندبوونا بهایێ وزێ دبیتە ئەگەرێ زێدەبوونا هەڵاوسانێ. هەر چەندە هەڵاوسان ب شێوەیەکێ گشتی زێڕی سەرنجڕاکێشتر دکەت، لێ بلندبوونا سوودا بانکی فشارێ دئێخیتە سەر خواست ل سەر زێڕی، چونکی زێڕ کانزایەکە کو سوود (فایدە) ل سەر وەرناگریت.
پێدڤی ب ئاماژەپێدانێ یە کو زێڕی د ڤێ مەهێ دا زێدەتر ژ 14% ژ بهایێ خۆ ژ دەست دایە، کو مەزنترین دابەزینا هەیڤانە یە ژ سالا 2008ێ وەرە. ئەڤە ژی ژبەر ب هێزبوونا دۆلاری بوو کو ژ دەستپێکرنا شەڕێ ئەمریکا و ئسرائیل دژی ئیرانێ ل 28ی شوباتێ، ب رێژەیا 2% بلند بوویە.
سەبارەت ب کانزایێن دی یێن گرانبەها، بهایێ زیڤی ب رێژەیا 0.8% بلند بوو و گەهشتە (68.67) دۆلاران، پلاتین ب رێژەیا 2.5% بۆ (1909.45) دۆلاران و پالادیۆم ژی ب رێژەیا 3.2% بۆ (420.63) دۆلاران بلند بوون.
بادینان دەیلی – پشکا ئابۆری