بادینان دەیلی:
وەزارەتا چاندن و ژێدەرێن ئاڤێ یا حکومەتا هەرێما کوردستانێ ب فەرمی بڕیار دا رێ ب هاوردەکرنا تەماتا بیانی بهێتە دان، ئەڤ چەندە ژی پشتی کێمبوونا بەرهەمێ ناڤخۆ و گرانبوونا بهایێ وێ د بازاڕێن هەرێمێ دا دهێت.
هیوا عەلی، پەیڤدارێ وەزارەتا چاندن و ژێدەرێن ئاڤێ راگەهاند: “پشتی مە وەک وەزارەت دیڤچوونەکا هویر بۆ بازاڕێن هەرێما کوردستانێ کری، بۆ مە دیار بوو کو بەرهەمێ تەماتێ ب رێژەیەکا بەرچاڤ کێم بوویە، ئەڤێ چەندێ ژی کاریگەری ل سەر بهایێ وێ کریە و گران بوویە، لەوما وەزارەتێ بڕیار دا دەرگەهێن هاوردەکرنێ بۆ تەماتا بیانی ڤەکەت.”
ل گۆرەی داخویانییا پەیڤدارێ وەزارەتێ، بهایێ ئێک کیلۆیا تەماتێ د بازاڕان دا گەهشتیە (1500) دیناران، کو ئەڤە ژی بارگرانی بۆ وەلاتییان دروست کربوو. هەروەسا ئاماژە ب وێ چەندێ ژی کر کو بڕیارا ڤەکرنا دەرگەهان بۆ تەماتا بیانی هەر ژ دوهی ڤە کەفتیە د وارێ بجهئینانێ دا.
د هەمان دەم دا، ل سەر ئاستێ عێراقێ ژی رێ ب هاوردەکرنا تەماتێ هاتیە دان. شارەزایێن چاندنێ ئەگەرێ ڤێ کێمبوونا تەماتێ بۆ نەگەهشتنا بەرهەمێ ناڤخۆ یێ وەرزێ نوو د ڤێ قۆناغێ دا دزڤرینن.
چاوەڕێ دهێتە کرن ب گەهشتنا تەماتا بیانی بۆ بازاڕان، د چەند رۆژێن داهاتی دا بهایێ تەماتێ ب رێژەیەکا باش دابەزیت و ڤەگەڕێتە سەر حالەتێ خۆ یێ ئاسایی.
بادینان دەیلی – پشکا نووچەیان