بارسێلۆنا چاڤدێرییا یاریزانەکێ ریال مەدرید دکەت. ئایا ڤیکتۆر مونۆز دێ زڤریتە ڤە؟

بادینان دەیلی:
لدویف ڕاپۆرتێن رۆژنامەڤانی، یانەیا بارسێلۆنا ئارەزوویا ئیمزاکرنا گرێبەستەکێ دگەل “ڤیکتۆر مونۆز”، یاریزانێ بالێ یێ یانەیا ئۆساسۆنا دکەت د ڤێ هاڤینێ دا، بەلێ ئەڤ کارە ب “گرێبەستەکا مەحال” دهێتە هەژمارتن.

گرێدانا دگەل ریال مەدرید:
ئەگەرێ سەرەکی یێ ب زەحمەتبوونا ڤێ گرێبەستێ ئەوە کو یانەیا ریال مەدرید خودانا 50% ژ مافێن ڤی یاریزانی یە، هەروەسا مافێ کڕینەڤا وی ژی ل دەف ریال مەدرید یێ پاراستی یە. رۆژنامەیا “مۆندۆ دیپۆرتیڤۆ” ئاماژە ب وێ یەکێ کرییە کو بارسێلۆنا د درێژاهییا ڤێ وەرزێ دا چاڤدێرییا مونۆزی کرییە و ب ئاستێ وی یێ بلند گەلەک سەرسام بووینە.

مونۆز و قوتابخانەیا بارسێلۆنا:
جێگێ ئاماژێ یە کو ڤیکتۆر مونۆز ل باژێرێ بارسێلۆنا ژ دایک بوویە و بەری بچیتە یانەیا دام و پاشان بۆ ریال مەدرید، چەند سالەکان د ئەکادیمییا بارسێلۆنا دا (لاماسیا) یاری کرییە، لەوما ئەو یاریزانەکێ شارەزایێ شێوازێ یارییا بارسێلۆنایە.

نرخ و مەرجێن کڕینێ:
مونۆز پار سال چوویە ئۆساسۆنا، بەلێ ریال مەدرید مافێ کڕینەڤا وی بۆ سێ سالان یێ هەی، کو نرخێن وێ ب ڤی ڕەنگی نە: (8 ملیۆن بۆ سالا ئێکێ، 9 ملیۆن بۆ سالا دویێ، و 10 ملیۆن یۆرۆ بۆ سالا سێیێ). ژ ئالیەکێ دی ڤە، مەرجێ هەلوەشاندنا گرێبەستا مونۆزی دگەل ئۆساسۆنا 40 ملیۆن یۆرۆ نە، و یانەیا ئۆساسۆنا ئامادە نینە ب کێمتری ڤی پارەی دەستبەرداری وی بیت.

وەرزێ زێڕین یێ یاریزانی:
ئەستێرەیێ گەنجێ ئۆساسۆنا د ڤێ وەرزێ دا ئاستەکێ نایاب پێشکێش کرییە، و توانی خەلاتێ باشترین یاریزانێ ژێر 23 سالی یێ لالیگا بۆ هەیڤا ئادارا (3) ب دەست ڤە بینیت، هەروەسا بۆ ئێکەم جار د مێژوویا خۆ دا هاتە بانگهێشتکرن بۆ هەلبژاردەیا ئیسپانیا.