پشتی کو حکومەتا هەرێما کوردستانێ لیستا مووچەیێ مەها ٢ (شوباتێ) و میزان موراجەعە رەوانەی بەغدا کری، وەزارەتا دارایی یا عێراقێ ب فەرمی دەست ب پرۆسەیا هویربینیکرنێ د لیستەيان دا کریە.
پێشهاتێن نوو یێن مووچە و پەترۆلێ:
داخوازییا خەرجکرنێ: وەزارەتا دارایی یا هەرێمێ ب فەرمی نڤیسارەک ئاراستەی وەزارەتا دارایی یا عێراقێ کریە بۆ خەرجکرنا مۆچەیێ مەها شوباتێ، پشتی کو هەمی پابەندیێن خۆ بجهئیناین.
هەناردەکرنا پەترۆلێ: حەیان عەبدولغەنی، وەزیرێ پەترۆلا عێراقێ راگەهاند؛ هەناردەکرنا پەترۆلا هەرێمێ ب بێ ئاریشە بەردەوامە و رۆژانە د ناڤبەرا ٢٠٠ بۆ ٢١٠ هزار بەرمیلان دهێنە هەناردەکرن.
داهاتێ نەپەترۆلی: کارکرن بۆ کۆمکرنا ١٢٠ ملیار دینارێن داهاتێ نەپەترۆلی یێ هەرێمێ دەستپێکرییە و د چەند رۆژێن بهێت دا دێ ب نەقد (کاش) رادەستی لقێ هەولێرێ یێ بانکا ناڤەندی یا عێراقێ هێتە کرن.
چەوانیا دابەشکرنا مووچەی:
هەرچەندە رێکارێن هویربینیکرنێ دەستپێکرینە، لێ هێشتا ژڤانێ دقیق یێ ناردنا پارەی ژ بەغدا نەدیارە. ئەڤە ژی ژبەر وێ سستیا د پرۆسەیا دابەشکرنا مووچەی دا ل عێراقێ ب گشتی هەی؛ چونکی سەرارای هندێ کو ل ٢٢ێ مەهێ دەست ب پارەبەخشینێ هاتییە کرن، لێ هێشتا مووچەیێ چەندین وەزارەتان ل بەغدا ب تەمامی نەهاتییە دابەشکرن.
هەروەسا هاتییە زانین کو وەزارەتا دارایی یا عێراقێ مووچەیێ هێزێن ئەمنی ب شێوازێ “رەسید” بۆ وەزارەتێن ناڤخۆ و بەرگری رەوانە کریە، لێ هێشتا پارە نەچوویە سەر هەژمارێن بانکی یێن مووچەخۆران.