ل دویڤ زانیاریێن تایبەت یێن ب دەست کەفتین، بڕیارە حەفتیا بهێت لیستا مووچەیێن فەرمانبەرێن هەرێما کوردستانێ بۆ بەغدا بهێتە رەوانەکرن. دگەل گەهشتنا لیستێ، وەزارەتا دارایی یا عێراقێ دێ دەست ب رێکارێن هنارتنا پارەی و خەرجکرنا مووچەیان کەت.
تەمامبوونا لیستا مووچەی ب سیستەمێ “پەیرۆل”
هەمان زانیاری دیار دکەن کو ئەڤرۆ هەمی رێکارێن بەرهەڤکرنا لیستا مووچەیان ب دویماهیک هاتینە. لیست ب سیستەمێ “پەیرۆل” (Payroll) هاتییە رێکخستن کو هەمی هویرکاریێن پێدڤی یێن فەرمانبەر و مووچەخۆران تێدا هاتینە جێگیرکرن. ژێدەران دوپات کریە کو چ کێشەیێن تەکنیکی د ناڤ لیستا ڤێ مەهێ دا نینن و ئامادەیە بۆ وردبینیکردنێ ژ لایێ بەغدا ڤە.
شاندهکێ هەرێمێ دێ چیتە بەغدا
ژ لایەکێ دیڤە، دهێتە چاڤەرێکرن حەفتیا بهێت شاندەکێ تەکنیکی و دارایی یێ حکومەتا هەرێمێ سەرهەدانا بەغدا بکەت. ئارمانجا سەرەکی یا ڤێ سەرهەدانێ، دانوستاندنە ل سەر وى پارەیێ کو ژ ئالیێ عێراقێ ڤە بۆ مووچەیان نەهاتییە خەرجکرن، دا کو رێکارێن یاسایی و دارایی بۆ بدەستڤەئینانا وى پارەیی بهێنە بڕێڤەبرن.
ئەڤ پێشڤەچوونە د دەمەکی دایە کو مووچەخۆرێن هەرێمێ ب پەرۆش ڤە چاڤەڕێی گەهشتنا پارەیێ مووچەی نە دا کو خشتەیێ دابەشکرنێ بهێتە راگەهاندن.