مووچەیێ هەیڤا ئادارێ؛ بتنێ رادەستکرنا 120 ملیار دینارێن داهاتێ ناڤخۆ مایە:
بادینان دەیلی:
ل گۆرەی دووماهیک پێشهاتێن پەیوەندیێن دارایی د ناڤبەرا هەولێر و بەغدا دا، ئەڤرۆ سێ گاڤێن گرنگ یێن کارگێری بۆ هنارتنا مووچەیێ هەیڤا ئادارێ ژ لایێ وەزارەتا دارایی ڤە دهێنە تەمامکرن و بتنێ ئێک مەرجێ دارایی ل پێشیا خەرجکرنا پارەی مایە.
وەزارەتا دارایی و ئابۆری یا حکومەتا هەرێما کوردستانێ ئاماژە ب وێ چەندێ کر کو ئەڤرۆ دێ لیستا مووچەیی و راپۆرتا تەرازوویا پێداچوونێ رادەستی فەرمانگەها ژمێریاری ل وەزارەتا دارایی یا فیدراڵی هێنەکرن. ئەڤە ژی وەک ئامادەکارییەک بۆ ئێکلاکرنا لیستا مووچەخۆرێن هەرێمێ.
د هەمان دەم دا، وەزارەتا پەترۆلا عێراقێ نڤیسارا فەرمی یا بەردەوامییا هنارتنا پەترۆلا هەرێما کوردستانێ بۆ دەرڤە گەهاندیە وەزارەتا دارایی یا فیدراڵی، کو ئەڤە ژی گاڤەکا تەکنیکی و کارگێری یا گرنگ بوو.
ل گۆرەی زانیارییان، نوکە بتنێ ئێک گاڤا کارگێری مایە بۆ وێ چەندێ بەغدا مووچەیێ هەیڤا ئادارێ یێ فەرمانبەر و مووچەخۆرێن هەرێمێ رەوانە بکەت؛ ئەو ژی ئەوە کو پێدڤییە وەزارەتا دارایی یا هەرێما کوردستانێ د ڤان چەند رۆژێن بهێت دا بڕێ (120 ملیار دینارێن) داهاتێ ناڤخۆ رادەستی حکومەتا فیدراڵی بکەت.
ئەڤ پێشهاتە د دەمەکێ دایە کو ل بەغدا و پارێزگەهێن دی یێن عێراقێ، دەست ب بەلاڤکرنا مووچەیێ هەیڤا ئادارێ یێ فەرمانبەران هاتیە کرن و چاڤەڕێ دهێتە کرن پشتی تەمامبوونا رێکاران، پارەیێ مووچەیێ هەرێمێ ژی بهێتە خەرجکرن.
بادینان دەیلی – پشکا نووچەیان
ڕۆژنامەنووس لە بادینان دەیلی.
