د ماوەیێ بۆری دا ژبەر راوەستیانا کار و ئاریشەیێن ئەمنی ل کێلگەها کۆرمۆر قەیرانا کێمبوونا گازی و بلندبوونا نرخێ وێ پەیدابوو لێ دگەل ئاساییبوونا رەوشێ و دەستپێکرنەڤەیا هنارتنا پشکا پارێزگەهان بزاڤ بۆ کۆنترۆڵکرنا نرخ و دابینکرنا پێدڤیێن وەلاتیان یێن بەردەوامن و رەوش بەرەڤ ئاساییبوونێ دچیت
هەولێر بەلاڤکرنا گازێ دێ بیتە پێنج رۆژ و کارتا ئەلیکترۆنی یا کارایە
ئەڤرۆ سێشەمبی سالار محەمەد رێڤەبەرێ پشکنین و دویڤچوونێ ل رێڤەبەریا بەلاڤکرنا نەفت و کانزایێن هەولێرێ راگەهاند کو پرۆسەیا بەلاڤکرنا بتلێن گازا مالان بەرەڤ باشبوونکا دیار دچیت و رێژەیا گازا دگەهیتێ زێدەبوویە
سالار محەمەدی ئاماژە ب وێ یەکێ کر کو بەری نوکە د حەفتیەکێ دا تەنێ دوو رۆژان گاز دهاتە بەلاڤکرن لێ ژبەر زێدەبوونا بەرهەمی نوکە بوویە سێ هەتا چار رۆژ د حەفتیەکێ دا
ئەو بەرپرسە ئاشکرا ژی کر ئەگەر بۆ رۆژێن بهێت بڕێ گازا دگەهیت ب ڤی رەنگی بیت دێ ئاستێ بەلاڤکرنێ بلند کەن بۆ پێنج رۆژان د حەفتیەکێ دا و د هەر گەریانەکا بەلاڤکرنێ دا نێزیکی 35 هەتا 40 هزار بتل دهێنە بەلاڤکرن
دەربارەی میکانیزمێ ژی ناڤبری دیار کر کو پرۆسە ب تمامی ب رێکا کارتا ئەلیکترۆنی دبیت کو نوکە د دەستێ وەلاتیان دایە و هەر کەسەکێ بتلەکێ وەرگریت دێ 10 رۆژان مینیت دا کو ماف هەبیت بتلا دووێ وەرگریت
هەروەسا گۆت نرخێ لیترەکا گازا شل د بازاری دا گەهشتیە هزار هەتا هزار و سەد دیناران کو دابەزینەکا بەرچاڤە و هەر دەمێ رێژەیا تانکەرێن گازێ یێن ژ چەمچەمال دهێن بگەهیتە 14 هەتا 18 تانکەران دێ نرخ ب تمامی وەک خوە لێ هێتەڤە
سلێمانی قەیران ب دووماهی هاتیە و پشت ب فۆرمێ خوارنێ دهێتە بەستن
هەر ئەڤرۆ کۆچەر تاهیر نوینەرێ کارگەهێن گازێ ل پارێزگەها سلێمانیێ راگەهاند کو پشکا پارێزگەها سلێمانیێ ژ گازا کۆرمۆر نێزیکی 240 تۆنانە و پشتی دەستپێکرنەڤەیا کێلگەهێ نوکە هەمان بڕ دگەهیتە وان
کۆچەر تاهیری جەخت کر کو قەیرانا گازا شل ب دووماهی هاتیە چونکی تەنێ ل سەنتەرێ باژێرێ سلێمانیێ رۆژانە نێزیکی 15 هەتا 20 هزار بتل دهێنە بەلاڤکرن و ل قەزایێن دی ژی ب گۆری پشکا وان دهێتە بەلاڤکرن
دەربارەی نرخێ وێ ژی گۆت هەر بتلەک ب 8 هزار و 500 دیناران دهێتە بەلاڤکرن و هەر بریکارەک ب گرانتر بفرۆشیت دێ لێپێچینەڤەیا یاسایی دگەل هێتە کرن چونکی رەوش ئاسایی بوویە و پێدڤی ناکەت ب گران بفرۆشن
هەروەسا روون کر کو بەلاڤکرن ب رێکا فۆرمێ خوارنێ دبیت دا کو ب دادپەروەری بگەهیتە دەستێ هەمی مالان و پشتی چەند رۆژێن دی و ئاساییبوونا تمامی هەر مالەک دێ شێت پێنج هەتا شەش بتلان وەرگریت ب بێ چ ئاریشە