بەلافکرنا زێدەتر ژ 10 ملیۆن لیترێن نەفتا سپی ل سەنتەرێ قەزایێن سنوورێ پارێزگەها دهۆکێ بەردەوامە و پشکا گازا مالان ژی ئاسایی بوویە رێڤەبەرێ نەفت و کانزایێن دهۆکێ رادگەهینیت کو زێدەتر ژ 80% ژ وێ نەفتا ژ بەغدا هاتی هاتیە بەلافکرن
ب گۆتنا رێڤەبەرێ نەفت و کانزایێن دهۆکێ پرۆسەیا بەلافکرنا نەفتا سپی ئەوا ژ بەغدا هاتیە دابینکرن قۆناغەکا باش بڕیایە و بتنێ سەنتەرێ باژێران ڤەدگریت
ل دویف داتایێن رێڤەبەریا نەفت و کانزایێن دهۆکێ:
بڕێ نەفتێ 10 ملیۆن و 792 هزار لیتر بۆ سنووری هاتینە تەرخانکرن
مفا وەرگر زێدەتر ژ 107 هزار خێزان ژ ڤێ پشکێ دێ مفا وەرگرن
بڕێ دیاریکری بۆ هەر خێزانەکێ: بۆ هەر مالەکێ 100 لیترێن نەفتێ هاتینە دیارکرن
دەڤەر پرۆسە هەر ئێک ژ سەنتەرێ قەزایێن دهۆک و ئاکرێ و بەردەڕەش و سێمێل و ئیدارا سەربەخۆیا زاخۆ ڤەدگریت
ب دوماهیک هاتنا قەیرانا گازا مالان
دەربارەی دابینکرنا گازا مالان رەوش زڤریە باری ئاسایی رێڤەبەرێ نەفت و کانزایێن دهۆکێ جەخت ل سەر وێ چەندێ کر کو ژ ئەڤرۆ پێدا رەوشا دابینکرنا گازێ ب تەمامی ئاسایی بوویە و روژانە بڕێ پێتڤی دگەهیتە دەستێ وان و ب ڤێ چەندێ ژی کێشەیا کێمییا گازێ ل دەڤەرێ دێ هێتە چارەسەرکرن
ئەڤ ئاسایی بوونا رەوشا گازێ پشتی وێ چەندێ دهێت کو ژبەر شەڕێ د ناڤبەرا ئەمریکا و ئیسرائیل دگەل ئێرانێ دا یێ کو ل 28ی شوباتێ دەستپێکری و بۆ ماوەیێ 40 رۆژان بەردەوام بوو بەری راگەهاندنا ئاگربەستێ بەرهەمئینان ل کێلگەها کۆرمۆر راوەستابوو و پشکا باژێران ژی بۆ کیمتر ژ نیڤێ کێم بووبوو ب رەنگەکێ کو ل هەولێرێ و سلێمانیێ بەلافکرنا گازێ ببوو هەفتیێ دوو جاران و بهایێ بوتلەکا گازێ یا بازرگانی گەهشتبوو سەری 30 هزار دیناران