ئەڤرۆ چارشەمبی بهایێ ئۆنسەکا زیڤی سێ پۆینت سیه و ئێک دۆلاران ب رێژەیا چار پۆینت پێنجی ژ سەدێ بلند بوو و ب حەفتێ و شەش پۆینت بیست و شەش دۆلاران مامەڵە پێ هاتە کرن و ب ڤی رەنگی بهایێ ئێک کیلۆگراما زیڤی ل بازارێن جیهانێ گەهشتە دوو هزار و چار سەد و پێنجی و دوو دۆلاران
ئەڤە بلندترین ئاستێ بهایێ زیڤی یە د ماوێ سێ هەفتیێن رابردوو دا دهێتە تومار کرن و پشتی هندێ هات کو ئەمریکا و ئیرانێ ئاگر بەستەک بۆ ماوێ دوو هەفتیان راگەهاند و دۆناڵد ترەمپ سەرۆکێ ئەمریکا ژی هێرشێن خۆ یێن پلان بۆ دارێژتی بۆ سەر ژێرخانێ ئیرانێ راوەستاندن دا کو دەلیڤە بۆ گۆتۆبێژێن چارەسەریا شەری پەیدا بیت
ترەمپی راگەهاند کو پێشنیارەکا دەه خاڵی ژ ئیرانێ پێگەهشتیە و وەسف کر کو ئەڤە بنەمایەکێ گونجایە بۆ دانوستاندنان کو د ڤان دوو هەفتیان دا رێککەفتن بهێتە کرن و جێبەجێ کرن د هەمان دەم دا ئیران رازی بوویە تەنگا هورمز بۆ ماوێ دوو هەفتیان ڤەکەت ب مەرجەکێ هەمی هێرش بهێنە راوەستاندن و هاتوچۆ ب هەماهەنگی د گەل هێزێن وێ بیت و ئیسرائیل ژی رازیبوونا خۆ ل سەر ڤێ ئاگر بەستا کاتی دیار کریە
جێیێ ئاماژێ یە بهایێ زیڤی پشتی دەستپێکرنا شەری ب رێژەیا زێدەتر ژ بیست ژ سەدێ دابەزیبوو و بلندبوونا بهایێ وزێ ژی نیگەرانی ل سەر زێدەبوونا هەڵاوسانێ دروست کربوو کو ئەڤە دبووە فشار ل سەر بانکێن ناوەندی دا کو رێژەیا سوودێ بلند بکەن یان ژی کێم نەکەن