بادینان دەیلی:
بەرپرسێن یانەیا بارسێلۆنا ب ئێکجاری دەرگە ل بەر سینگێ بێرناردۆ سیلڤای، ستێرێ پۆرتۆگالی یێ یانەیا مانچێستەر سیتی گرتن و پەیاما “وەخت ب دوماهی هات” بۆ فرێکر.
هەرچەندە هاڤینا بهێت گرێبەستا وی د گەل مانچێستەر سیتی ب دوماهی دهێت و ئەو بخۆ ژی گەلەک حەز دکەت ل بارسێلۆنا یاریێ بکەت، بەلێ بێرناردۆ سیلڤا ب تەمامی ژ پلانێن داهاتی یێن یانەیا کەتەلۆنی هاتە دەرخستن.
بڕیارا دوماهیێ یا بارسێلۆنا
ژێدەرەکێ نێزیکی بارسێلۆنا بۆ رۆژنامەیا “مۆندۆ دیپۆرتیڤۆ” راگەهاندیە کو یانە د مێرکاتۆیا هاڤینا داهاتی دا چ بزاڤان بۆ ڤەگوهاستنا سیلڤایێ ٣١ سالی ناکەت و ب کورتی گۆتیە: “وەختێ وی ب دوماهی هات”.
ئەڤ بڕیارە د دەمەکێ دا دهێت کو خۆرخی میندێز، برێڤەبەرێ کارێن سیلڤای، پەیوەندیەکا گەلەک باش د گەل یانەیا بارسێلۆنا هەیە، بەلێ ستافێ تەکنیکی ب سەرکردایەتییا “هانزی فلیک” یێ ل سەر وێ باوەریێ کو ئەڤ یاریزانە نوکە نە بژاردەیا وانە.
ئەگەرێن رەتکرنا سیلڤای
رۆژنامێ ئاماژە ب هندێ ژی کریە کو د هێڵا ناڤین یا بارسێلۆنا دا یاریزانێن گەلەک هەنە کو د جهێ وی دا یاریێ دکەن، زێدەباری هندێ کو ژیێ وی یێ بەرەڤ مەزنبوونێ دچیت.
بێرناردۆ سیلڤا ل هاڤینا ٢٠٢٢ێ ئارمانجا سەرەکی یا بارسێلۆنا بوو ل سەر داخوازا چاڤی هێرناندێز، راهێنەرێ پێشوو. وێ گاڤێ یاریزان یێ بەرهەڤ بوو فشارێ ل سەر مانچێستەر سیتی بکەت دا کو بچیتە کەتەلۆنیا، بەلێ گرێبەست سەرنەکەفت. هەمان دەلیڤە ل هاڤینا ٢٠٢٣ێ ژی دووبارە بوو، بەلێ بارسێلۆنا ل دوماهیێ بڕیار دا ل شوینا وی “ئیلکای گوندۆگان” ئیمزا بکەت.
ستراتیژیا نوو یا فلیکی
نوکە و پشتی دەربازبوونا چار سالان ژ گرنگیدانا ب ڤی یاریزانی، دیارە بارسێلۆنا بڕیارا خۆ یا دوماهیێ دایە. یانە یێ ب باشتر دبینیت کو نوکە پارێن خۆ مەزێختە (خەرج کەتە) سەر ب هێزکرنا هێڵا هێرشبەری و ئینانا بەرگریکارەکێ چەپ یێ نوی، نەک ئیمزاکرنا گرێبەستێ د گەل یاریزانەکێ هێڵا ناڤین کو ژیێ وی یێ نێزیکی ٣٢ سالی دبیت.
ژێدەر: مۆندۆ دیپۆرتیڤۆ / بادینان دەیلی