بادینان دەیلی:
دوو تیمێن هەڤپشک ژ وەزارەتا نەفتێ و کۆمپانیا نەفتا باکۆر، مژوولی چێکرنا هێڵا دووێ یا ٤٦ ئینجی یا هناردەکرنا نەفتا کەرکووکێ نە بەرەڤ بەندەرێ جەیهان ل تورکیا، کو نێزیکی ١٠٠ کیلۆمەتر ژ ڤێ هێڵێ تووشی کێشەیێن تەکنیکی بووینە.
ل دویڤ زانیاریێن کۆمپانیا نەفتا باکۆر، ئەڤ هێڵە ٣٢٨ کیلۆمەتر یا درێژە؛ ژ کەرکووکێ دەستپێدکەت بەرەڤ دەڤەرا شەرگات ل پارێزگەها سەلاحەدین و پاشان ل رۆژهەلاتێ پارێزگەها نەینەوا دەرباز دبیت تا دگەهیتە پێشابوور ل هەرێما کوردستانێ، بەری کو د سنوورێ تورکیا دا دەرباز ببیت.
ئەگەرێن تێکچوونا هێڵێ
ژ کۆما ٣٢٨ کیلۆمەتران، کێشە ل نێزیکی ١٠٠ کیلۆمەتران هەیە، کو دکەڤیتە ناڤبەرا دەڤەرا شەرگات و سنوورێ پارێزگەها نەینەوا د گەل هەرێما کوردستانێ. ئەڤ بەشێ هێڵێ ژ ئەگەرێ شەڕێ داعش و قاچاخبرنا نەفتێ هاتیە کونکردن و تێکدان. هەرچەندە پشکنینا هەوا و ئاڤێ بۆ هێڵێ هاتیە کرن و تیم مژوولی چێکرنێ نە، بەلێ تا نوکە چ ژڤانەکێ دیارکری بۆ بکارئێخستنا وێ نینە.
کارتێکرنا شەڕێ ئیران و ئەمریکا ل سەر نەفتا عیراقێ
ژ ئەگەرێ شەڕێ ئیرانێ د گەل ئەمریکا و ئیسرائیلێ، ژ ٢٨ی شوباتێ وەرە پڕانیا هناردەکرنا نەفتا عیراقێ ژ بەندەرێن بەسرە هاتینە راگرتن. ئەڤە ژی ژبەر هندێ یە کو گەروویا هورمز ب نیڤە-داخستی دهێتە هەژمارتن، کو ئەڤ گەروویە رێکا سەرەکی یا هناردەکرنا پتری ٩٠٪ یا نەفتا عیراقێ یە.
حەزا وەزارەتا نەفتێ بۆ زێدەکرنا هناردەیێ
نوکە عیراق رۆژانە ٢٥٠ هزار بەرمیلێن نەفتا کەرکووکێ ب رێکا بۆریا هەرێما کوردستانێ بۆ بەندەرێ جەیهان دهناردەت. وەزارەتا نەفتێ بزاڤێ دکەت هێڵا ٤٦ ئینجی یا کەرکووکێ دووبارە بکاربێخیت دا کو بڕێ نەفتا دهێتە هناردەکرن زێدە بکەت، کو بەری دەستپێکرنا شەڕی، عیراقێ رۆژانە نێزیکی ٣.٤ ملیۆن بەرمیلێن نەفتێ دهناردە دکرن.
ژێدەر: بادینان دەیلی