بادینان دەیلی:
ژبەر زێدەبوونا گرژیێن سەربازی د ناڤبەرا (ئەمریکا و ئسرائیل) دا دژی (ئیرانێ)، بازاڕێن دارایی یێن جیهانێ تووشی شۆکەکا مەزن بوون و د دەمێ هەیڤەکێ دا، ب بڕێ (11.5 ترلیۆن دۆلاران) ژ بهایێ پشکان کێم بوویە.
ل گۆرەی راپۆرتەکا رۆژنامەیا “یەنی شەفەق” یا تورکی، ژ وێ گاڤا ئەمریکا و ئسرائیلێ ل 28ێ شوباتێ هێرشێن خۆ یێن سەربازی بۆ سەر ئیرانێ دەستپێکرین، بازاڕێ پشکان ب رێژەیەکا بەرچاڤ دابەزیە. ئامار ئاماژێ ب وێ چەندێ دکەن کو بهایێ پەترۆلێ ب رێژەیا 45% بلند بوویە، ئەڤە ژی بوویە ئەگەرێ دروستبوونا شۆکەکا وزێ کو د مێژوویێ دا وێنە نەبوویە.
هەروەسا پێوەرێن “بلۆمبێرگ” بۆ بهایێ بازاڕێ پشکان ل جیهانێ نیشان ددەن کو کۆمێ گشتی یێ بهایێ بازاڕی ژ (157.5 ترلیۆن دۆلاران) بۆ (146 ترلیۆن دۆلاران) دابەزیە. ئەڤ دابەزینا مەزن ب تنێ د چار حەفتیێن دەربازبووی دا هاتیە تۆمارکرن.
شارەزایێن ئابۆری دیار دکەن کو ژبەر بەرفرەهبوونا هەڤرکیێن دەڤەرێ و نەدیاربوونا رەوشا سیاسی، وەبەرهێنەران پەنا بریە بەر کڕینا وان کەلوپەلێن کێم مەترسی و ژ وان پشکان دویرکەفتینە یێن کو ئەگەرێ زیانێن مەزن ل سەر هەین.
بادینان دەیلی – پشکا ئابۆری