بادینان دەیلی:
پشتی کو ستێرا ناڤدارا جیهانی، محەمەد سەلاح، راگەهاندی کو ل دووماهییا وەرزی (2025-2026) دێ ڕێزێن یانەیا لیڤەرپۆل یا ئینگلیزی بجهـ هێلیت، ئێدی یانەیێن جیهانی دەست ب پێشبرکێ کریە بۆ ب دەستڤەئینانا ڤی یاریزانی. د نووترین پێشهات دا، یانەیا نیویۆرک ستی یا ئەمریکی یەکەم پێشنیار ئاراستەی ستێرا مسری کریە.
سەلاح یێ تەمەن 33 سالی، هەر چەندە گرێبەستا وی ل گەل لیڤەرپۆلێ هەتا هاڤینا 2027ێ یا بەردەوامە، لێ هەردو ئالی گەهشتینە وێ رێککەفتنێ کو ل هاڤینا بهێت ب شێوەیەکێ “بێ بەرامبەر” کەلها “ئانفیلد” بجهـ بهێلیت.
د ڤێ دەربارێ دا، براد سیمز، رێڤەبەرێ جێبەجێکار یێ یانەیا نیویۆرک ستی یا ئەمریکی، د کۆنفرانسەکێ وەرزشی دا حەزا یانەیا خۆ بۆ ڤەگوهاستنا سەلاحی ئاشکرا کر و گۆت: “ئەم گەلەک حەز دکەین محەمەد سەلاحی ب درێسێ یانەیا خۆ ببینین، لێ تشتێ گرنگ ئەوە: ئەرێ یاریزان بخۆ حەز دکەت بهێتە خۆلا ئەمریکی و ل باژێرێ نیویۆرک بژیت؟”
سیمز ئاماژە ب وێ چەندێ ژی کر کو هەتا نوکە چو دانوستاندنێن فەرمی ل گەل سەلاحی یان بریکارێن وی نەهاتینە کرن، و دیار کر کو ئەو بزاڤێ ناکەن چو یاریزانەکێ نەچار بکەن یان قایل بکەن کو بهێتە نیویۆرک، بەلکو ئەو یاریزان دڤێن یێن کو ب راستی دڤێن ل وێرێ بن و ببنە نموونە بۆ یاریزانێن گەنج و د راهێنانان دا بزاڤێن مەزن بکەن.
یانەیا نیویۆرک ستی خودان مێژوویەکا درێژە د ئیمزاکرنا گرێبەستان ل گەل ستێرێن جیهانی، وەک (پێرلۆ، داڤید ڤیا و فڕانک لامپارد). ب چوونا سەلاحی بۆ خولا ئەمریکی (MLS)، ناڤێ وی دێ چیتە پاڵ ستێرێن وەک (مێسی، سوارێز و سۆن)، هەروەسا گریزمان ژی کو بڕیارە ل هاڤینا بهێت پەیوەندیێ ب یانەیا ئۆرلاندا ستی بکەت.
بادینان دەیلی – پشکا وەرزشی