بادینان دەیلی:
ل گەل ڤەکرنا دەرگەهێن بازاڕێن جیهانی یێن پەترۆلێ د ئەڤرۆ دا، جارەکا دی بهایێ زێڕێ ڕەش بلندبوونەکا بەرچاڤ تۆمار کر و هەر بەرمیلەکا پەترۆلێ ب زێدەتر ژ 115 دۆلاران بازار پێ هاتە کرن.
ل گۆرەی دووماهیک پێشهاتێن بازاڕی، ئەڤرۆ بهایێ هەر بەرمیلەکا پەترۆلا خاڤ ب (115 دۆلار و 66 سەنتان) دهێتە کڕین و فرۆشتن. ئەڤە ژی د دەمەکێ دایە کو بهایێ وێ ب هەڤبەرکرن ل گەل دوهی ب رێژەیا 3 دۆلاران بلند بوویە، کو دوهی ب 112 دۆلاران بوو.
شارەزا و چاڤدێرێن بازارێن وزێ دیار دکەن کو ئەڤ بلندبوونا بلەز پەیوەندی ب ئالۆزیێن سیاسی و سەربازی یێن دەڤەرێ ڤە هەیە، ب تایبەتی پشتی گەفێن حووسییان بۆ دائێخستنا “دەرتەنگا باب ئەلمەندەب”. ئەڤ دەرتەنگە وەک دەرتەنگا هۆرمز ب ئێک ژ گرنگترین رێڕەوێن بازرگانیا جیهانی و ڤەگوهاستنا پەترۆلێ دهێتە هەژمارتن.
هەروەسا د ڤێ مەهێ دا، بهایێ پەترۆلێ ب رێژەیەکا بەرچاڤ یا بەردەوام د بلندبوونێ دایە. ئەگەرێ سەرەکی یێ ڤێ رەوشێ ژی بۆ زێدەبوونا گرژیێن د ناڤبەرا (ئەمریکا و ئسرائیل) ژ لایەکێ و (ئیرانێ) ژ لایەکێ دی ڤە دهێتە ڤەگەراندن، کو کاریگەریەکا راستەوخۆ ل سەر سەقامگیریا بازارێن جیهانی یا وزێ کریە.
بادینان دەیلی – پشکا نووچەیان