رێڤەبەرێ بانکا بارکلیز: مەترسیێن بهایێ وزێ و سوودێ د ناڤ بازاران دا ب کێم دهێنە دیتن.

بادینان دەیلی:
ستیڤن داینتۆن، رێڤەبەرێ بانکا بارکلیز ڕاگەهاند کو وەبەرهێنەر مەترسییێن بلندبوونا بهایێ وزێ و رێژەیا سوودێ (فایدەی) ب کێم دبینن و بازار وەک پێدڤی خۆ بۆ ڤان مەترسییان ئامادە نەکرییە.

مەترسیێن بهایێ نەفتێ:
داینتۆن د دیدەڤانییەکێ دا ل پەراوێزا لوتکەیا “پێشینەیا دەستپێشخەرییا پاشەرۆژا وەبەرهێنانێ” ل مەیامی گۆت: “ئەگەر ڕوودانێن نوکە هەتا وەرزێ هاڤینێ بەردەوام بن و بهایێ نەفتێ د ناڤبەرا 110 بۆ 130 دۆلاران دا بمینیت، ئەڤە دێ بیتە ئەگەرێ نیگەرانییەکا مەزن بۆ قەرزان، گەشەکرنا ئابووری و مەترسییا پاشەکشەیەکا مەزن د بازاران دا.”

ئالۆزیێن ئیرانێ و کارتێکرن ل سەر پشکان:
ڕۆژا ئەینیێ، بهایێ نەفتا برێنت بۆ زێدەتر ژ 112 دۆلاران بلند بوو، ئەڤە ژی بوو ئەگەرێ دابەزینا پشکێن ئەمریکی. داینتۆن دیار کر کو زێدەبوونا ئالۆزییان ل ئیرانێ نیگەرانیێن جیهانێ پتر لێ کرینە کو بلندبوونا بهایێ وزێ زیانێن گران ب ئابووریا جیهانی بگەهینیت.

ئاڵێنگاریێن ل پێشیا ئەوروپا:
رێڤەبەرێ بانکا بارکلیز ئاماژە ب وێ یەکێ کر کو ئەوروپا ڕووبەڕووی ئاستەنگێن مەزن بوویە، چونکی وڵاتێن ب هێز یێن وی کیشوەری تووشی گەشەیەکا خاڤ بووینە و شیانێن دارایی یێن حکومەتان یێن سنووردارن، لەوما کێمتر دشێن بەرەنگاری شۆکێن ئابووری ببن، ب تایبەت ئەگەر دابینکرنا نەفت و گازێ پچڕیت.

بێهێزییا ئەوروپا و ب هێزییا ئەمریکا:
داینتۆن پێ پێ وایە کو بازارێ پشکێن ئەمریکی ب هێزترە، چونکی خواستنا بکاربەران ل وێ دەرێ یا زێدەیە و وەبەرهێنانەکا مەزن د بیاڤێ ژیرییا دەستکرد (AI) و خەرجیێن بەرگریێ دا هەیە. وی گۆت ژی: “پشکێن ئەمریکا و ئاسیا باشترن ژ پشکێن ئەوروپا.”

چارەنڤیسێ رێژەیا سوودێ (فایدەی):
دەربارەی پاشەرۆژێ، داینتۆن گۆت ئەگەر ئەڤ شۆکە یا کورتخایەن بیت، ڕەنگە بانکێن ناوەندی دەست ب کەمکرنا رێژەیا سوودێ بکەنەڤە. بەلێ ئەگەر ئالۆزی بۆ ماوەیەکێ درێژ بەردەوام بن، پێشبینی دهێتە کرن سیاسەتڤانێن دارایی رێژەیا سوودێ پتر بلند بکەن دا کو کۆنترۆلا هەڵئاوسانێ بکەن.