بادینان دەیلی:
یاریزانێن هەلبژاردەیا بەرازیل ب بەردەوامی مژوولی خۆ ئامادەکرنێ نە بۆ دویەم یارییا خۆ یا دۆستانە. پشتی کو د یارییا بۆری دا بەرامبەر فەرەنسا دۆراندین، ئەڤجارە ل ڕۆژا چوارشەمبییا بهێت دێ ڕووبەڕووی هەلبژاردەیا کڕواتیا بن.
ڕەوشا هنگافتنێن (پێکانێن) یاریزانان:
بۆ یارییا بهێت، “رافینها” ژ بەر هنگافتنێ پشکداریێ ناکەت؛ ئەو یاریزانە د یارییا فەرەنسا دا بریندار ببوو و دێ بۆ ماوێ هەیڤەکێ ژ یاریگەهان دویر کەڤیت. ژ ئالیەکێ دی ڤە، “ڤینیسیۆس جونیۆر” ژی ب ئەگەرێ پێکانی پشکداری د ڕاهێنانێن تیما خۆ دا نەکرییە، لەوما یا ب زەحمەتە بۆ یارییا کڕواتیا ئامادە بیت. بەلێ نووچەیەکێ خۆش بۆ هاندەرێن بەرازیل ئەوە کو “مارکینیۆس”ێ بەرگریکار ب تەمامی ژ پێکانێ چاک بوویە و دێ د ڤێ یارییێ دا پشکدار بیت.
ئیگۆر تیاگۆ؛ ئەستێرەکا نوو د ناڤ سامبایێ دا:
“ئیگۆر تیاگۆ” هێرشبەرێ یانەیا برێنتفۆرد یا ئینگلیزی، بۆ ئێکەم جار ژ ئالیێ ڕاهێنەر “کارلۆ ئانچێلۆتی” ڤە هاتییە بانگهێشتکرن. تیاگۆ د یارییا فەرەنسا دا 19 خولەکان پشکداری کربوو. ئەو دەربارەی حەزا خۆ دبێژیت:
“مەزنترین دەستکەفتێ ژیانا من ئەوە کو من درێسێ هەلبژاردەیا وەلاتی پۆشی. ئەڤە خەونا من بوو و سوپاس بۆ خودێ بوو ڕاستی. دیتنا یاریزانێن مەزن هێزەکا زێدەتر ددەتە من.”
دیاردە (رۆناڵدۆ) نموونا وی یا بلندە:
تیاگۆ زێدەتر گۆت: “نموونا من یا بلند (قدوة) رۆناڵدۆیێ دیاردەیە. هەرچەندە من ئەو ژ نێزیک نەدیتییە، بەلێ کاتێ سەیری یارییێن وی دکەم، چێژەکا مەزن ژێ وەردگرم. شانازییەکا مەزنە ئەز نوکە ل جهێ وی درێسێ بەرازیل دپۆشم و هیڤیدارم دلێ هاندەران خۆش بکەم.”
یارییا ئێکلاکرنێ:
لدویف ڕاپۆرتێن ڕۆژنامەیا “گڵۆبۆ” یا بەرازیلی، ئەڤ یارییە بەرامبەر کڕواتیا دێ چارەنڤیسێ پێکهاتەیا بەرازیل ب تمامێ ئێکلا کەت. چاڤەڕێ دهێتە کرن کارلۆ ئانچێلۆتی ئەڤێ یارییێ بکەتە پێوەر بۆ دەستنیشانکرنا یاریزانێن سەرەکی یێن کو دێ د مۆندیالێ دا پشکداریێ کەن.