بادینان دەیلی:
وەزارەتا دارایی و ئابووری یا هەرێما کوردستانێ، ژ پێخەمەت خێراکرنا پرۆسەیا هویربینیێ و دویرکەفتن ژ هەر ئاستەنگەکا تەکنیکی کو ببیتە ئەگەرێ گیرۆبوونا مووچەیی، چەند ڕێنمایەکێن نوو ئاراستەی وەزارەت و فەرمانگەهان کرن.
ئەڤ ڕێکارێن نوو د سێ خالێن سەرەکی دا کورت دبنەڤە:
١. هەماهەنگی د ناڤبەرا میلاکات و ژمێریاریێ دا: پێدڤییە ل هەمی وەزارەتان هەماهەنگییەکا ڕاستەوخۆ د ناڤبەرا بەرپرسێ میلاکاتان و بەرپرسێ لیستا مووچەیی دا هەبیت، دا کو داتا ب ئێکگرتوویی بمینن.
٢. هاوتاکرنا ژمارەیا میلاکاتان: دڤێت ژمارەیا میلاکێن وەزارەتان ب تەمامی ل گەل وان داتایان بگونجیت یێن کو د لیستا مووچەیی و سیستەمێ (Kit) یێ ڕێڤەبەرییا گشتی یا ژمێریاری دا هاتینە تۆمارکرن.
٣. پشتڕاستکرنا دروستییا داتایان: ل دەمێ ڕادەستکرنا پوختەیا لیستا مووچەیی بۆ پشکا (Kit)، پێدڤییە هەردو بەرپرسێن (میلاکات و لیستا مووچەیی) ئامادە بن، دا کو ب دوماهی جار ڕاستی و دروستییا ژمارەیان بهێتە پشتڕاستکرن.
ژ لایەکێ دی ڤە، وەزارەتا دارایی جەخت ل سەر وێ چەندێ کرییە کو ئەگەر هەر جوداهییەک د میلاکاتان دا هەبیت، دڤێت ب نڤیسارەکا فەرمی و ب دیارکرنا ئەگەران، پشکێن پەیوەندیدار ل ڕێڤەبەرییا میلاکاتان ئاگەهدار بکەن دا کو بهێنە چاککرن.
ڕەوشا نوکە یا مووچەیی:
وەزارەتا دارایی یا هەرێمێ هەمی ئامادەکاریێن خۆ بۆ ڕەوانەکرنا لیستا مووچەیێ مەها سێ و تەرازوویا پێداچوونێ (میزان موراجەعە) یا مەها دو ب دوماهی ئیناینە. د نوکە دا تەنێ چاڤەڕێی ئاماژەیەکێ ژ وەزارەتا دارایی یا ئیراقێ دکەن دا کو لیستان ڕەوانەی بەغدا بکەن و پرۆسەیا تەمویلکرنا مووچەیی بێی گرفت دەستپێبکەت.
بادینان دەیلی | ٢٠٢٦
