بادینان دەیلى:
سەرۆکێ ئەمریکا ڕایگەهاند کو هەر گاڤا شەڕێ ئیرانێ ب دویماهی هات، بهایێ پەترۆلێ د بازارێن جیهانێ دا دێ ب لەزاتییەکا مەزن دابەزیت. هەروەسا ئاماژە ب وێ یەکێ ژی کر کو وان ب قەست هندەک ژ ژێرخانێن پەترۆلی و خزمەتگۆزارییێن تارانێ نەکرینە ئارمانج، چونکی نەڤێت خەلکێ وی وەلاتی تووشی ئێش و ئازارێن دەمدرێژ ببن.
بهایێ پەترۆلێ ئێک ژ هەستیارترین بابەتێن ئابۆری یێن جیهانێ یە، و هەر ئالۆزییەکا سیاسی یان سەربازی ل رۆژهەلاتا ناڤین، کو دلێ بەرهەمئینانا وزەیێ یە، ئێکسەر کاریگەریێ ل سەر بازاران دکەت.
ڕۆژا دووشەمبی 16ێ ئادارا 2026ێ، دۆناڵد ترەمپ، سەرۆکێ ئەمریکا د پەیوەندییەکا تەلەفۆنی دا ل گەل میدیایێن وەلاتێ خۆ، ڕۆناهی ئێخستە سەر دوماهی پێشهاتێن شەڕی و کارتێکرنا وی ل سەر بازارێ وزەیێ و ڕاگەهاند: “هەر دەمێ شەڕ ب دویماهی هات، بهایێ پەترۆلێ دێ وەک جاران نزم بیت و ئەز باوەرم شەڕ گەلەک درێژ نابیت.”
ل دۆر هنارتنا هێزێن پیادە (ئەردی) بۆ ناڤ ئاخا ئیرانێ، سەرۆکێ ئەمریکا ئامادە نەبوو چ زانیارییان بدەت و گۆت: “بۆچوونا من ل سەر ڤی بابەتی نەهاتییە گوهۆڕین، لێ من نەڤێت چ ستراتیژییەکا سەربازی بۆ رۆژنامەڤانان ئاشکرا بکەم.”
ڕۆژا ئەینیێ ئەمریکا هێرش کرە سەر گزیرتەیا “خارگ”، دۆناڵد ترەمپ ل دۆر ڤێ هێرشێ ڕاگەهاند: “ب تەمامی گزیرتە ژ کار کەفتییە، بتنێ بۆرییێن پەترۆلێ نەبن کو من ب مەرەم نەڤییا ئارمانج بگرم؛ چونکی چەندین سال دڤێن دا کو دووبارە بهێنە ئاڤاکرن.” هەروەسا تەکەزی کر کو ڕێ نەدایە هێرش ژ 90 مەتران پتر نێزیکی چ سازیەکا پەترۆلی ببیت.
سەرۆکێ ئەمریکا دبێژیت، نەڤێت خەلکێ ئیرانێ تووشی نەخۆشییێن دەمدرێژ ببیت، لەوما گەلەک ژ ژێرخانەیێن وان پاراستینە و گۆت: “دشێم د دەمژمێرەکێ دا هەمی وێستگەهێن کارەبا ئیرانێ ژ ناڤ ببەم، لێ نوکە خۆ ژێ دپارێزم، چونکی ئاڤاکرنا وان دەمەکێ زۆر دڤێت.”
ئەڤ ئۆپەراسیۆنێن سەربازی یێن ئەمریکا و ئسرائیلێ ل سەر ئیرانێ ژ 28ێ شوباتا بوری ڤە دەستپێکرینە و تارانێ ب مۆشەک و درۆنان بەرسڤ دایە. وەک کارڤەدانەک ژی، بەرپرسێن ئیرانێ گەفا هندێ دکەن کو دێ ژێرخانەیا وزەیێ و کارەبا وەلاتێن کەنداڤی کەنە ئارمانج.
دەرتەنگا هورمز کو ڕێڕەوێ سەرەکی یێ ڤەگوهاستنا پەترۆلا جیهانێ یە، ژ 2ێ ئادارا ئەڤ سالە وەرە ژ لایێ ئیرانێ ڤە هاتییە گرتن، کو ڤێ چەندێ وایە کرییە هەمی جیهان چاڤەڕێی بهایێ پەترۆلێ و ئاسایشا وزەیێ بن.
