بادینان دەیلی – هەولێر:
ب مەرەما کۆنترۆلکرنا بهایێ غازێ و رێگریکرن ل گرانبوونا وێ، وەزارەتا سامانێن سرۆشتی یا حکومەتا هەرێما کوردستانێ بڕیارەکا نوو د بەرژەوەندیا وەلاتییان دا دەرکر و پرۆسەیا دابەشکرنا غازێ ب بهایێ فەرمی دەستپێکر.
کۆنترۆلکرنا بهایێ بازاڕی
وەزارەتا سامانێن سرۆشتی راگەهاند کو ژ پێخەمەت کونترۆلکرنا بلندبوونا بهایێ غازا مالان، رێڤەبەرییا نەفت و کانزایان ل هەولێرێ دەست ب دابەشکرنا غازێ ب رێکا بریکارێن گەرۆک کریە. ئەڤ پرۆسەیە ب رێکا سیستەمێ کارتا ئەلکترۆنی دهێتە ئەنجامدان دا کو ب یەکسانی بگەهیتە دەستێ هەمی وەلاتییان.
مەرج و رێکارێن وەرگرتنێ
ل گۆرەی راگەهاندنا وەزارەتێ، ئەڤ پرۆسە دێ بۆ دەمێ ٣٠ رۆژان یا بەردەوام بیت. هەر وەلاتییەکێ خودان کارتا ئەلکترۆنی دشێت ٢ قەلینەیێن غازێ ب بهایێ فەرمی یێ حکومەتێ کو تنێ (٨,٥٠٠) دینارن بکڕیت.
پارێزگەهێن دی ژی دێ گرتەڤە
وەزارەتا سامانێن سرۆشتی ئاماژە ب وێ یەکێ ژی کر کو ئەڤ پێنگاڤە ل هەولێرێ دەستپێکریە و د رۆژێن داهاتی دا، رێڤەبەرییێن نەفت و کانزایان ل پارێزگەهێن دی یێن هەرێمێ (دهۆک و سلێمانی و هەڵەبجە) دێ ب هەمان سیستەم و رێکارێن گونجای دەست ب دابەشکرنا غازێ کەن بۆ ئەوەی رێگری ل گرانبوونا بهایێ غازێ بێتە ل هەمی دەڤەران بێتە کرن.
ژێدەر: بادینان دەیلی
رێکەفت: ١١/٣/٢٠٢٦
