بادینان دەیلی:
ململانێیا د ناڤبەرا خوان لاپۆرتا، سەرۆکێ یانەیا بەرشلۆنە و چاڤی هێرناندێز، راهێنەرێ پێشوو و ئەفسانەیا یانەیێ جارەکا دی سەرهەلدایە، ئەڤ چەندە ژی هەڤرکییا ل سەر پۆستێ سەرۆکایەتییا یانەیا کەتەلۆنی ب هێزتر لێ دکەت.
چاڤی: لاپۆرتا ل پەیمانێن خۆ پاشگەز بوو
چاڤی هێرناندێز د دیدەڤانییەکا نوو دا هێرشەکا توند کرە سەر لاپۆرتای و ڕاگەهاند کو ئەو د هەلبژارتنێن داهاتی یێن سەرۆکایەتییا یانەیێ دا پشتەڤانییا “ڤیکتۆر فۆنت” دکەت و چو باوەری ب لاپۆرتای نینە. چاڤی گۆت: “لاپۆرتای گەلەک پەیمان دانە من، لێ ل هەمییان پاشگەز بوو. وی دگۆت تیپا من ژ لایێ جەستەیی ڤە یا لاوازە، لێ ئەڤە تەنێ بهانە بوون دا کو من ژ کار لادەت.”
ئاشکەراکرنا نهێنییا مێسی
دەربارەی نەزڤڕینا لیۆنێل مێسی بۆ یانەیێ، چاڤی تومەتەکا گران ئاراستەی لاپۆرتا دکەت و دبێژیت: “مێسی یێ بەرهەڤ بوو بزڤریتە بەرشلۆنە و هەتا گرێبەست ژی یا بەرهەڤ بوو، لێ لاپۆرتای رێگری لێ کر و گرێبەست ژ سەر مێزێ ڕاکر. راستی ئەوە کو مێسی نەزڤڕی چونکی سەرۆکێ یانەیێ نەدڤیا ئەو بزڤریت.”
بەرسڤا توند یا لاپۆرتای
د بەرامبەر ڤان ئاخفتنان دا، خوان لاپۆرتا ب شێوەیەکێ ڕاستەوخۆ بەرسڤا چاڤی دا و هێرش کرە سەر شیانێن وی وەک راهێنەر و گۆت: “ئەو تشتێ نوکە هانسی فلیک ب ڤێ پێکهاتەیا بەرشلۆنە دکەت، چاڤی ب هەمان یاریزانان نەشیابوو ئەنجام بدەت.”
ئەڤ شەڕێ راگەهاندنێ و شکاندنا ئێکودوو د دەمەکێ دا دهێت کو ل ناڤ یانەیا بەرشلۆنە دا هەڤرکی ل سەر دەستەلاتێ گەهشتییە لووپکێ، و چاڤی ب ڤان ئاخفتنان دڤێت پێگەهێ لاپۆرتای ل دەف جەماوەری لاواز بکەت.
بادینان دەیلی – بۆ نووچەیێن وەرزشی یێن جیهانی
