چەند هەیڤەکێن کێم بۆ دەستپێکرنا مۆندیالا ٢٠٢٦ێ ماینە، کو ب پشکدارییا ٤٨ هەلبژاردەیان ل هەرسێ وەڵاتێن (ئەمریکا، مەکسیک و کەنەدا) دهێتە ئەنجامدان. لێ زنجیرەیەکا کێشەیێن جودا بووینە مەترسی ل سەر بڕێڤەچوونا ڤێ قارەمانییا مەزن.
گرانبوونا بێ وێنە یا بهایێ بلیتان
ئێک ژ کێشەیێن سەرەکی، گرانبوونا بهایێ بلیتێن یارییانە کو خەلکەکێ زۆر نیگەران کریە. بهایێ هندەک بلیتان ٥ جاران زێدە بوویە؛ بۆ نموونە بلیتا یارییا دەستپێکێ ژ ٨٩٥ دۆلاران بۆ ٥٣٠٠ دۆلاران بلند بوویە.
کێشەیا سیاتێل و هەلبژاردەیێن موسڵمان
کێشەیەکا دی یا هەستیار ل باژێرێ سیاتێلێ سەرهەلدایە؛ ل ٢٦ێ حوزەیرانێ کو “رۆژا هاورەگەزخوازانە”، بڕیارە هەردوو هەلبژاردەیێن ئیران و میسر یارییا بکەن. ڤان هەردوو هەلبژاردەیان داخوازا پاشخستنا ئاهەنگێن وێ رۆژێ کریە، لێ سەرۆک شارەوانییا سیاتێلێ ئەڤ داخوازە رەت کریە.
گەفێن ئەمنی یێن باژێرێ فۆکسبۆرۆ
ل لایەکێ دی، سەرۆک شارەوانییا باژێرێ فۆکسبۆرۆ گەف کریە کو ئەگەر بودجەیا ئەمنی بۆ باژێرێ وان زێدە نەبیت، ئەو دێ ٧ یارییێن مۆندیالێ یێن ل وێ دەرێ دهێنە ئەنجامدان هەلوەشینن، ژبەر کو نەشێن کۆنترۆلا هاندەران بکەن.
سەرەڕای ڤان هەمی ئاستەنگان، فیدراسیۆنا تەپاپێ یا جیهانی (FIFA) ب بەردەوامی بزاڤا چارەسەرکرنا کێشەیان دکەت و چاڤەڕێ دهێتە کرن مۆندیالا ٢٠٢٦ ببیتە پڕهاندەرترین مۆندیال د مێژوویێ دا.
