یانەیا دهۆکێ د بەیاننامەیەکێ دا موژدە دایە هەڵۆیێن خۆ کو د ماوێ دوو تا سێ رۆژێن بهێت دا، هاروون ئەحمەد، ناڤەراستکارێ یانەیێ، دێ زڤریتە راهێنانان.
هاروون ئەحمەد، ناڤەراستکارێ یانەیا دهۆکێ، د یارییا دەربازبوویی یا یانەیا خۆ دگەل قاسم د گەڕا شازدێ یا خولا ئەستێرەیێن عێراقێ دا، هەر ژ نیڤا ئێکێ ژ بەر پێکانێ یاریگەهـ ب جهـ هێلا. سەرەتا دهاتە پێشبینیکرن کو ئەو یاریزانە دێ ماوەیەکێ درێژ ژ یاریگەهان دوور کەڤیت، لێ یانەیا دهۆکێ راگەهاند کو پشتی ئەنجامدانا پشکنینێن پزیشکی، دیار بوو کو پێکانەکا هاروون نە یا گرانە و بتنێ دوو بۆ سێ رۆژان دێ دوور کەڤیت و پشتی وێ دێ دەست ب راهێنانێن خۆ کەت.
ل گۆرەیی زانیارییێن کوردستان24، دەستەیا پزیشکی یا یانەیا دهۆکێ پێشنیار بۆ راهێنەرێ یانەیێ دکەن کو ژ پێخەمەت نەهێلانا مەترسییێ ل سەر یاریزانی، بۆ یارییا بهێت دگەل کارەبا پشوو بدەنە هاروون ئەحمەد، کو بریارە یاری ل رۆژا ئەینییا بهێت ل بەغدا بهێتە کرن.
هاروون ئەحمەد ئەڤ وەرزە دگەل یانەیا دهۆکێ ئاستەکێ بلند پێشکێش کریە و دەنگۆیەک ژی هەیە کو بۆ یارییا بهێت یا هەڵبژارتیا عێراقێ د پاشکۆیا پاڵاوتنێن مۆندیالا 2026ێ دا بهێتە بانگهێشتکرن.
