جڤاتا وەزیرێن عێراقێ د کۆمبوونەکا خۆ دا پشکا هەرێما کوردستانێ و داهاتێن نەفتێ گۆتوبێژ کر، و بڕیار هاتە دان کو د ماوێ دوو حەفتییان دا راپۆرتەک ژ لایێ لیژنەیەکا هەڤبەش ژ دیوانا چاڤدێرییا دارایی یا فیدرالی و هەرێما کوردستانێ ڤە بهێتە ئامادەکرن. د هەمان کۆمبوونێ دا، جەخت ل سەر وێ چەندێ هاتە کرن کو هنارتنا مووچەیێن مووچەخۆرێن هەرێما کوردستانێ دێ بەردەوام بیت.
هەڵکەوت عەزیز، پەیامنێرێ تۆرا میدیایی رووداو ل بەغدا، هندەک زانیارییێن دەربارەی ناڤەرۆکا کۆمبوونێ ئاشکرا کر و راگەهاند کو زانیارییێن خۆ ژ خالید شوانی، وەزیرێ دادا عێراقێ وەرگرتینە.
پەیامنێرێ تۆرا میدیایی رووداو ل بەغدا گۆت، سەرۆکوەزیرێ عێراقێ د کۆمبوونێ دا راگەهاندییە کو دێ بەردەوام بن ل سەر هنارتنا مووچە بۆ مووچەخۆرێن هەرێما کوردستانێ.
هەڵکەوت عەزیز گۆت، خالید شوانی پێ راگەهاندییە کو قسە دگەل تەیف سامی، وەزیرا دارایی یا عێراقێ کریە دەربارەی مووچەیێ کانوونا دووێ 2026ێ یێ فەرمانبەرێن هەرێما کوردستانێ؛ پێ گۆتییە کو چ کێشەیەک نینە، چاڤەرێی وێ چەندێ دکەن حکومەتا هەرێما کوردستانێ پابەندبوونێن خۆ جێبەجێ بکەت و پشتی هنارتنا 120 ملیار دیناران، مووچەیێ مەها ئێکێ دێ هێتە هنارتن.
هەڵکەوت عەزیز گۆت ژی، وەزارەتا دارایی یا عێراقێ چاڤەرێی 120 ملیار دینارانە، ژ بەر کو پرسێن پەیوەندیدار ب لیستا مووچەی و تەرازوویا پێداچوونێ ل وەزارەتا دارایی یا عێراقێ ب دووماهی هاتینە.
پەیامنێرێ رووداو ئاماژە ب وێ چەندێ ژی کر کو رێکار دێ وەکری هنارتنا مووچەیێ فەرمانبەرێن هەرێما کوردستانێ بکەڤیتە حەفتییا بهێت.
دەربارەی داهاتێ هەرێما کوردستانێ، سەرۆکێ دیوانا چاڤدێرییا دارایی یا عێراقێ د کۆمبوونێ دا بەشدار بوو و بەحسێ وێ پارەیێ کر کو بۆ هەرێما کوردستانێ هاتییە هنارتن.
هەڵکەوت عەزیز دبێژیت، سەرۆکێ دیوانا چاڤدێرییا دارایی یا عێراقێ ئاماژە ب وێ چەندێ کریە کو د سالێن 2023، 2024 و 2025ێ دا نێزیکی 16 تریلیۆن دینار بۆ هەرێما کوردستانێ هاتینە هنارتن و گۆتییە کو هەرێما کوردستانێ زێدەتر ژ وێ پشکێ وەرگرتییە کو بۆ وێ هاتییە دیارکرن.
دواتر وەزیرێن کورد گۆتینە کو ئەو وردەکارییێن د ناڤ راپۆرتەکا سەرۆکێ دیوانا چاڤدێرییا دارایی دا هەڵە تێدانە و پێدڤییە پێداچوون بۆ بهێتە کرن.
وەزیرێن کورد راگەهاندییە کو حکومەتا عێراقێ بەری ڤان سێ سالان بڕەکا زۆر پارەی نەهنارتییە و لەورا دڤێت سەیری پرۆسەیێ ب گشتی بهێتە کرن، نەکو بتنێ ڤان سێ سالان.
وەک هەڵکەوت عەزیز دبێژیت، پێداگرییا وەزیرێن کورد وای کریە کو بڕیار بهێتە دان لیژنەیەکا هەڤبەش ژ دیوانا چاڤدێرییا دارایی یا عێراقێ و چاڤدێرییا دارایی یا هەرێما کوردستانێ بهێتە پێکئینان و د دوو حەفتییان دا راپۆرتەکا دی یا تێر و تەسەل بهێتە ئامادەکرن.
هەڤدەم د. عەبدوڵڵا عەلیاوەیی، راوێژکارێ محەممەد شیاع سوودانی، سەرۆکوەزیرێ عێراقێ کو د کۆمبوونێ دا ئامادە بوو، بۆ تۆرا میدیایی رووداو راگەهاند، “هەموو وەزیرێن کورد ب تەواوی بەرگری ل ماف، قووتی و بژێوییا وەلاتییێن هەرێما کوردستانێ کر.”
ئەو راوێژکارێ سوودانی ئاماژە ب وێ چەندێ ژی کر کو هەموو وەزیران و سەرۆکوەزیرێ عێراقێ هەڤڕا بوون ل سەر وێ چەندێ کو “پێدڤییە مووچەیێ فەرمانبەرێن هەرێما کوردستانێ ژ پرسێن سیاسی بهێتە جوداکرن و فەرمانبەر مووچەیێن خۆ وەرگرن.”
