واشنتۆن – ئاژانسێن نووچەیان
بەرپرسێن بلند یێن ئاساییشا نەتەوەیی یا ویلایەتێن یەکگرتی یێن ئەمریکا، سەرۆک دۆنالد ترەمپ ئاگەهدار کریە کو سوپایێ وەلاتی هەمی بەرهەڤیێن پێدڤی بۆ ئەنجامدانا دربەکێ سەربازی دژی ئیرانێ ب دویماهی ئیناینە. ل دویڤ پێشبینییان، چاڤەرێ دهێتە کرن ئەڤ لێدانە ل رۆژا شەمبیا بهێت دەستپێبکەت.
لڤینێن سەربازی یێن پێنتاگۆنێ
د هەمان دەم دا، وەزارەتا بەرگرییا ئەمریکا (پێنتاگۆن) دەست ب لڤاندنا هێزێن خۆ کریە وەک ئامادەکاریەک بۆ هەر کاردانەوەیەکا توند یا تارانێ. ژێدەرێن هایدار دیار دکەن کو پێنتاگۆنێ ب رەنگەکێ دەمکی هندەک ژ کارمەند و هیزێن خۆ ژ ناوچەیا رۆژهەلاتا ناڤین بەرەڤ ئەورۆپا و ئەمریکا ڤەگوهاستینە، دا کو د دەمێ هەر ئالۆزییەکێ دا زیانێن وان کێم بن.
بڕیارا دووماهیێ د دەستێ ترەمپی دایە
سەرەڕای بەرهەڤیێن سوپایی، هەردوو تۆڕێن نووچەیان یێن جیهانی (CBS News) و (CNN) راگەهاند کو هێشتا دۆنالد ترەمپی بڕیارا دووماهیێ ل سەر دەستپێکرنا هێرشێ نەدایە. ژێدەرێن نێزیک ژ کۆشکا سپی ئاماژێ ب هندێ دکەن کو ترەمپ د نوکە دا مژویلی زنجیرەکا کۆمبوونانە و وەرگرتنا راوێژانە بۆ هەلسەنگاندنا ئاکامێن بڕیارا دەستپێکرنا شەڕی ل گەل ئیرانێ.
دانوستاندنێن جنێڤێ و بژاردەیا دبلۆماسی
ئەڤ گرژییە د دەمەکی دانە کو بەری دوو رۆژان گەڕا دوێ یا دانوستاندنێن د ناڤبەرا هەردو لایان دا ل جنێڤێ ب دویماهیک هاتبوو. عەباس عێراقچی، وەزیرێ دەرڤە یێ ئیرانێ، دەربارەی وێ گەڕێ راگەهاندبوو کو وان لێکتێگەهشتنەکا باش کریە، لێ هێشتا خالێن ناکۆک و گرنگ د ناڤبەرا هەردو لایان دا ماینە و چارەسەر نەبووینە.
چاڤەرێ دهێتە کرن رۆژێن بهێت چارەنوسێ ئاشتی یان شەڕی ل ناوچەیێ دەستنیشان بکەن، د دەمەکی دا کو جیهان ب ترس و هوشیارییەکا مەزن چاڤەڕێی بڕیارا کۆشکا سپی دکەت.
