پەیاما سەروکێ هەرێما کوردستانێ هاتە خواندن ژلایێ پەیڤداریا سەروکاتیا هەرێما کوردستانێ ل باژێرێ ئستەنبولێ کو تێدا پەیاما سەروکێ هەرێما کوردستانێ بەرێز نێچیرڤان بارزانی هاتە خواندن، “قویناغەکا نوی دەستپێ کریە، هەروەسا دیارکریە کو شەر پەشیمانیێ ددویڤ خورا دئینیت” . هەروەسا نێچیرڤان بارزانی راگەهاند کو هەر چەندەکا ببیتە رێ خوشکەرەک بو پروسێسا ئاشتیێ دێ جێبەجێکەین. هەروەسا دیارکر کو پێنگاڤێن باش هاتینە هاڤێتن و پەیوەندیێن دناڤبەرا هەولێر و ئەنقەرە پێشکەفتنەکا باش بخوڤە دیتیە.
دەقێ پەیاما سەروک نێچیرڤان بارزانی کو ژلایێ پەیڤداری سەروکاتیا هەرێمێ هاتیە خواندن:-
“ رێزداران ئامادەکارێن کۆنفرانسێ،
مێهڤان و پشکدارێن هێژا،
رۆژا هەوە باش،
گەلەک سوپاسییا هەوە دکەم بۆ گازیکرنا من بۆ ڤی کۆنفرانسێ.
دیدگەها مە ل هەرێما کوردستانێ بۆ ئاشتییێ، دیدگەهەکا نەگوهۆر و ستراتیژییە. باوەریا مە ئەوە کو ئاشتی تنێ بێدەنگبوونا چەکی نینە، بەلکو پرۆسەیەکە بۆ ئاڤاکرنا پشتراستییێ، قەبویلکرنا ئێکدو و دیتنا خالێن هەڤپشک دناڤبەرا جوداهییان دا.
توندوتیژی و ناکۆکی، ژبلی وێرانکاری و پاشکەفتنێ، چو ئەنجامەکێ دی بۆ گەلان نەبوویە. لێ هەر دەمێ دەرگەهێ دانوستاندنێ هاتبیە ڤەکرن، هەر دەمێ ئیرادەیا سیاسی بۆ ئاشبتیێ هەبوویی، دەلیڤەیێن مەزن بۆ گەشەکرن و سەقامگیرییێ هاتینە پێش.
تورکیا وەلاتەکێ گرنگ و جیرانەکێ مە یێ ستراتیژییە. سەقامگیری و پێشکەفتنا تورکیا، کاریگەرییەکا ئێکسەر ل سەر سەقامگیرییا ئیراقێ و هەرێما کوردستانێ و هەمی دەڤەرێ هەیە. تورکیا د ئاشتییێ دا بهێزترە و دشێت رۆلەکێ مەزنتر د دەڤەرێ دا بگێریت.
سالێن بۆری، ب هەمی رەنگان پشتەڤانی ل ئاشتییێ کر. وێ قویناغێ سەلماند کو دانوستاندن دشێت دەستکەفتێن مەزن بۆ هەر ئالییەکی بدەستڤەبئینیت. ئەڤرۆ ژی، هەمی پشتەڤانییا خۆ بۆ سەرئێخستنا ئاشتییێ دوپات دکەین. هەرێما کوردستانێ وەکی هەردەم د دەڤەرێ دا دێ فاکتەرێ سەقامگیرییێ بیت.
پرۆسەیەکا هۆسا گرنگ د قویناغەکا هۆسا هەستیار دا، دشیاندایە ئاستەنگی بۆ چێببن، لێ دڤێت ئەو ئاستەنگە نەبنە ئەگەر بۆ ساربوونێ ژ ئاشتییێ. سەرکەفتنا ئاشتییێ پێدڤی ب هەناسەدرێژییێ هەیە. چەند دەمێ پێدڤی بیت، هۆسا دخوازیت بەردەوامی هەبیت.
ل ڤێرە دخوازم دەستخۆشییێ ل جەنابێ سەرۆک رەجەب تەیب ئەردۆگان بکەم بۆ رۆلێ گرنگ و دیدگەها وی یا ئازایانە د ڤەبوونێ دا بەرامبەر ئاشتییێ. ئەڤە گاڤەکا دیرۆکییە کو پێدڤی ب ئیرادەیەکا سیاسی یا بهێز، ئازایەتی، وێرهکی، قوربانیدان و گیانێ بەرپرسیاریەتییێ هەیە.
هەروەسان دەستخۆشبیێ ل رێزدار ئۆجالان و رێزدار دەولەت باخچەلی و هەمی وان کەسایەتی و ئالییان دکەین یێن کو خەمخۆرێن ئاشتیبێ نە و کاردکەن دا کو ئاشتی و پێکڤەژیان سەربکەڤیت. هەمی ئەوێن هەست ب وێ یەکێ دکەن کو پاشەرۆژ تنێ ل سەر بنەمایێ ئاشتی و سەقامگیرییێ دهێتە ئاڤاکرن.
ل دویماهییێ، هیڤییا سەرکەفتنێ بۆ کۆنفرانسێ هەوە دخوازم.
گەلەک سوپاسییا هەوە دکەم. “
