ریال مەدرید د دوایین یارییا خوە دا د خولا لالیگایێ دا، سەرکەفتنەکا بزەحمەت ل هەمبەر سێلتا ڤیگۆ ب دەستخست و ب شێوەیەکێ کاتی جوداهییا خوالان د گەل بارسێلۆنایا پێشەنگ بۆ ئێک خال کێمکر. لێ سەرەرای بردنەوەیێ، ئاستێ تیپێ چەندین نیشانەیێن پرسیارێ ل سەر شیانێن ئالڤارۆ ئاربێلوای دروستکرن.
د گەڕا 27ێ یا لالیگایێ دا، ریال مەدرید ب گۆلا ڤاڵڤێردی د خۆلەکا 95ێ دا شییا سێ خالان ب دەستڤە بینیت. ئەڤ ئەنجامە و شێوازێ یاریکرنا تیپێ بوونە ئەگەرێ رەخنەیێن توند. ئالڤارۆ ئاربێلوا ژ دەمێ ل جهێ چابی ئالۆنسۆی ئەرکێ راهێنەرایەتییا مێرەنگی وەرگرتی، نەشیایە چ گۆهرینان د شێوازێ یاریکرنێ دا بکەت، ئەڤە ژی ئاماژەیە کو ناڤبری د قەیرانەکا کوور یا تاکتیکی دایە. تەنانەت دهێتە گۆتن کو د ژوورا گۆهرینا جلان دا، یاریزانان متمانە ب پلان و شیانێن وی وەک راهێنەر نەماینە.
ل خوارێ 4 ئاماژە و بەلگەیێن ئیفلاسا تاکتیکی یا ئاربێلوای د یارییا سێلتا ڤیگۆ دا دیار دکەین:
1. نەبوونا پلانەکا تاکتیکی یا روون
ریال مەدرید د درێژاهییا یارییێ دا نەشیا چ هێرشێن رێکخستی و گروپ ب ئەنجام گەهینیت. هەردو گۆلێن ریال مەدرید بەرهەمێ بزاڤێن تاکەکەسی بوون؛ گۆلا ئێکێ ژ تۆپەکا جێگیر و گۆلا دوێ ژی ب ئەگەرێ شاشییا بەرگریکارێ سێلتا ڤیگۆ هات. تیپێ چ پلانەکا هێرشبەریا دیار نەبوو و نەدشیان دەلیڤەیێن گۆلکرنێ دروست بکەن.
2. بێدەسهەلاتی د ئاڤاکرنا هێرشان دا (Build-up)
سەرەرای هندێ کو ئاربێلوای چار یاریزانێن ناڤەراست خستبوونە د یارییێ دا، لێ تیپێ د ئاڤاکرنا هێرشان ژ هێلا پشتێ کێشەیێن مەزن هەبوون. ریال مەدرید نەدشیا تۆپێ ب دروستی بگەهینیتە دەڤەرا رکابەری، ئەڤە ژی وسا کربوو کو هێلا بەرگریێ بکەڤیتە بن فشارەکا مەزن.
3. پشتبەستنا تهمام ب شیانێن تاکەکەسی
وەک چەندین یاریێن دەربازبووی، ریال مەدرید هەر ب پشتبەستن ب بهێزییا یاریزانان و شاشیێن تیپا بەرامبەر یاری دکر. د گۆلا ئێکێ دا بزاڤێن تاکەکەسی یێن ئەلێکساندەر ئارنۆڵد، ئاردا گولەر و چۆامینی رۆل هەبوو، گۆلا سەرکەفتنێ ژی ب لێدانەکا ڤاڵڤێردی بوو کو بەرگریکارێ سێلتا ڤیگۆ ئاراستێ وێ گۆهری. ئەڤە نیشان ددەت کو تیپ وەک “کۆمەڵە” چ کارەکی ناکەت.
4. خواندنا خراب بۆ یارییێ و گۆهرینێن بێ مفا
ئاربێلوا ل سەر کورسییا یەدەگ بێدەسهەلات دیار بوو و نەشیا خوە د گەل گۆهرینێن یارییێ بگونجینیت، ب تایبەت ل هەمبەر مەترسییێن هێرشبەرێن سێلتا ڤیگۆ. ئەو گۆهرینێن وی ئەنجام داین چ گۆهرینێن ئەرێنی د ئاستێ تیپێ دا دروست نەکرن، ئەڤە ژی بێ ئەزموونییا وی د خواندنا پلانێن تیپا رکابەر دا نیشان ددەت.
