بادینان دەیلی:
ل بازارێن هەرێما کوردستانێ و جیهانێ، بهایێ زێڕی و زیڤی ب شێوەیەکێ “نەچاڤەڕێکری” بلند بوو. بهایێ مسقالەکا زێڕێ عەیار ٢١ گەهشتە ملیۆنەک و ٢٢ هزار دیناران، کو ب بڕێ ١٠٠ هزار دیناران ل چاڤ ڕۆژا دووشەمبی گرانتر بوویە.
د. مستەفا مەلا حەسەن، شارەزایێ ئابۆری د ڤی دەربارەی دا ڕاگەهاند: “ئێڤارییا ڕۆژا دووشەمبی بهایێ مسقالەکا زێڕی بۆ ٩٢٠ هزار دیناران دابەزیبوو، لێ هەر د وێ ڕۆژێ دا دەست ب بلندبوونێ کر هەتا کو گەهشتییە ڕادەیێ ملیۆنەک و ٢٢ هزار دیناران.”
ئەو شارەزایێ ئابۆری ئاماژە ب وێ چەندێ ژی کر کو خواست ل سەر کڕینا زێڕی گەلەک زێدە بوویە؛ پشتی دابەزینا کورت یا ڕۆژا دووشەمبی، کڕیارەکێ زۆر ڕوو ل بازاران کرییە. ئەڤ ڕەوشە تنێ ل هەرێمێ نینە، بەلکو ل وەلاتێ تورکیا ژ دوو ڕۆژان وەرە نۆبەیێن درێژ ل بەر دەرگەهێن زەرەنگران پەیدا بووینە، و ل ئیماراتێ ژی خواستەکا مەزن ل سەر زێڕی هەیە.
ژ لایێ تەکنیکی ڤە، شارەزا دبێژن گەهشتنا بهایێ هەر ئۆنسەیەکا زێڕی بۆ سەرووی ٤,٥٢٠ دۆلاران، متمانەیا کڕیاران زێدە کرییە و مەترسییێن بازاران تا ڕادەیەکێ کێم کرینە.
بهایێ زیڤی ژی ل سەرانسەری جیهانێ بلند بوو:
نەک تەنێ زێڕ، بەلکو بهایێ زیڤی ژی پڕەکا مەزن هاڤێتییە. ل چاڤ ڕۆژا دووشەمبی، هەر کیلۆیەکا زیڤی نێزیکی ٤٠٠ دۆلاران گران بوویە.
- ل بازارێن ناڤخۆ: کیلۆیەکا زیڤی گەهشتە سەرووی ٢,٥٥٠ دۆلاران.
- ل ئیستەنبوڵ: کیلۆیەکا زیڤی ب ٢,٤٨٠ دۆلارانە (پشتی کو دووشەمبی بۆ ٢,٠٥٠ دۆلاران دابەزیبوو).
- ل دوبەی: کیلۆیەکا زیڤی گەهشتە ٢,٤٠٠ دۆلاران.
- بهایێ ئۆنسەیەکا زیڤی ژی ل بازارێن جیهانێ گەهشتە سەرووی ٧٣ دۆلاران.
بادینان دەیلی | ٢٠٢٦
