بادینان دەیلی:
وەزارەتا شارەوانی و گەشتوگوزار ڕاگەهاند کو پتری ٤٩٠ هزار فۆرمێن فەرمانبەر، پێشمەرگە و خانەنشینان بۆ وەرگرتنا پارچە زەڤیان ڤەگەڕیاینە شارەوانییان و هەتا نوکە ژمارەکا زۆر ژ وان تیروپشک بۆ هاتینە کرن.
پشتی چەندین سالان ژ ڕاوەستاندنا دابەشکرنا زەڤیان، کابینەیا نەهێ یا حکومەتا هەرێما کوردستانێ بڕیار دا هەر فەرمانبەرەکێ مەرجێن پێدانیێ تێدا بن، پارچە زەڤییەکا ٢٠٠ مەتری وەرگریت. ل دویڤ زانیارییان، ڕەزامەندی ل سەر پتری ٤٩٠ هزار کەسان هاتییە دان و هەتا نوکە ٢٠٪ێ ژ ڤێ ڕێژەیێ تیروپشک بۆ هاتییە کرن.
سەربەست مەولوود، سەرپەرشتێ تیمێ وردبینییا فۆرمێن زەڤیێ ل وەزارەتا شارەوانیێ ڕاگەهاند: “جڤاتا وەزیران ڕەزامەندی ل سەر دوماهی پشکا فۆرمان دا کو ٢٥٠٠ فۆرمێن هەمی وەزارەتان د ناڤ دانە. پشتی بێهنڤەدانان، ئەڤ فۆرمە دێ بۆ شارەوانییان هێنە ڕەوانەکرن دا کو زەڤی بۆ بهێنە دابینکرن.” هەروەسا ئاشکرا کر کو نوکە کار ل سەر کۆکرنا داتایێن فەرمانبەرێن گرێبەست ژی دهێتە کرن دا کو ژمارەیا سوودمەندێن وان ژی بهێتە دیارکرن.
دابەشبوونا فۆرمێن پەسەندکری ل سەر پارێزگەهـ و ئیدارەیێن سەربەخۆ:
- هەولێر: پتری ١٤٠ هزار فۆرم
- سلێمانی: پتری ١٣٠ هزار فۆرم
- دهۆک: پتری ٨٦ هزار فۆرم
- سۆران: پتری ٤٠ هزار فۆرم
- ڕاپەڕین: پتری ٣٤ هزار فۆرم
- گەرمیان: پتری ٣١ هزار فۆرم
- زاخۆ: پتری ١٥ هزار فۆرم
- هەڵەبجە: پتری ١١ هزار فۆرم
ئەو کەسێن هەتا نوکە تیروپشک بۆ هاتییە کرن (٩٤,٢٧١ کەس):
- هەولێر: ٦٨,٠٠٠ کەس
- سلێمانی: ١٩,٥٠٠ کەس
- زاخۆ: ٤,٧٤٧ کەس
- دهۆک: ٣,٤٨٩ کەس
- سۆران: ٥٠٠ کەس
- (هەڵەبجە، ڕاپەڕین و گەرمیان هەتا نوکە چو زەڤی نەهاتینە دابەشکرن).
بادینان دەیلی | ٢٠٢٦
