بادینان دەیلی:
وەزیرێ تەندروستیێ ل هەرێما کوردستانێ ڕاگەهاند، کو ٢٨ پێشمەرگە ژ وان بریندارێن د هێرشا ئەڤرۆ دا بریندار ببوون، پشتی وەرگرتنا چارەسەرییێن پێدڤی ڕەوانەی مالێن خۆ هاتنە کرن و نوکە ڕەوشا وان یا جێگیرە.
د. سامان بەرزنجی، وەزیرێ تەندروستیێ یێ حکومەتا هەرێما کوردستانێ ڕاگەهاند: “پشتی پێشکێشکرنا هەمی خزمەتگۆزارییێن تەندروستی، نوکە ٢٨ پێشمەرگە چوونە مالێن خۆ. تەنێ دوو پێشمەرگە ژ برینداران ماینە کو ژبەر ناجێگیرییا بارێ وان یێ تەندروستی، بۆ نەخۆشخانەیێن هەولێرێ هاتینە ڤەگوهاستن.”
وەزیرێ تەندروستیێ ئاشکرا کر کو ئەو دوو پێشمەرگەیێن ل هەولێرێ، چوار نەشتەرگەری بۆ هاتینە کرن. هەروەسا گۆت: “سەرۆک بارزانی و سەرۆکێ حکومەتێ مەسرور بارزانی ب بەردەوامی ل سەر هێلن بۆ هایداربوون ژ ڕەوشا برینداران، و هەر تشتەکێ پێدڤی بیت د نەخۆشخانەیێن حکومەتێ دا دێ بۆ هێتە دابینکرن.”
دەربارەی هویرکارییێن برینان، د. سامان بەرزنجی ئاماژە ب وێ چەندێ کر کو ٨ پێشمەرگەیان برینێن گەلەک سادە هەبوون، و ٢٢ پێشمەرگەیێن دی ژی ل نەخۆشخانێ چارەسەری وەرگرتن. ژ وان ژی نوکە ٢٠ پێشمەرگە ڤەگەڕیانە مال، و تەنێ ئەو دوو پێشمەرگەیێن ل هەولێرێ ماینە د بن چاودێریێ دا.
ل دویماهیێ وەزیرێ تەندروستیێ دوپات کر کو وەزارەتا وان ژوورەکا ئۆپەراسیۆنان یا هەی کو شەڤ و ڕۆژ د خزمەتا پێشمەرگەیێن قەهرەمان دابن. هەروەسا دیار کر کو هەمی بریندار ل نەخۆشخانەیا ئاشتی ل سۆران و نەخۆشخانەیا خەلیفان هاتبوونە چارەسەرکرن.
بادینان دەیلی | ٢٠٢٦
