بادینان دەیلی:
ڤەکۆلینەکا نوو یا هەڤپشک د ناڤبەرا پسپۆرێن وەلاتێ چین و سوێدێ دا ئاشکرا دکەت، کو ل ڤان دوماهییان حالەتێن تێکچوونا بارودۆخێ دەروونی ل دەف بابان پشتی ژدایکبوونا زارۆکێن وان زێدە بووینە.
ئەڤ ڤەکۆلینە ژ لایێ پەیمانگەها “کارۆلینسکا” ل سوێدێ و زانکۆیا “سیچوان” ل چینێ ل سەر زێدەتر ژ ملیۆنەک بابان هاتییە ئەنجامدان. ئەنجامێن ڤەکۆلینێ دیار دکەن کو پیاو پشتی دەربازبوونا سالەکێ ب سەر ژدایکبوونا زارۆکێن وان، کێشە و گرفتێن دەروونی ل دەف وان پەیدا دبن، ب تایبەتی حالەتێن خەمۆکیێ و بێزاریێ ژ ژیانێ.
جینگ ژۆ، سەرپەرشتێ ڤەکۆلینێ د بەیانەکێ دا دبێژیت: “سەرەڕای وێ چەندێ کو باب شانازیێ ب بابینیا خۆ دکەن، لێ ژ ئەگەرێ تێکچوونا خەوێ و گۆڕانکاریێن د پەیوەندییا وان ل گەل هەڤژینێن وان دا پەیدا دبن، کاریگەرییەکا نەرێنی ل سەر لایەنێ وان یێ دەروونی دروست دکەت و تووشی خەمۆکیێ دبن.”
هەروەسا د ڤەکۆلینێ دا هاتییە کو پیاو د دەمێ دوگیانییا هەڤژینێن وان دا، ئەگەرەکێ زۆر یێ هەی پەنایێ ببەنە بەر ڤەخوارنێن کحولی و ماددەیێن بێهۆشکەر، و پشتی ژدایکبوونا زارۆکی ژی ئەگەرێ تووشبوونا وان ب خەمۆکیێ گەلەک یا زێدەیە.
ژبەر ڤێ چەندێ، پسپۆر پێشنیار دکەن کو پیاو ژی هاوشێوەیێ ژنان، پێدڤییە بەری و پشتی ژدایکبوونا زارۆکێن وان ل ژێر چاودێرییا پزیشکێن دەروونی بن، و ل دەمێ هەستکرن ب هەر نیشانەکێ، ڕاوێژێ ب کەسێن شارەزا و پسپۆر بکەن.
بادینان دەیلی | ٢٠٢٦
