بادینان دەیلی:
ژێدەرێن ڕۆژنامەڤانی ل فەرەنسا و ئیسپانیا سکاندالەکا پزیشکی یا بێ وێنە ل یانەیا ریال مەدرید ئاشکرا دکەن، کو بوویە ئەگەرێ دەرئێخستنا هەمی ستافێ پزیشکی یێ یانەیا شاهانە.
ل دویڤ ڕاپۆرتەکا رادیۆیا “مۆنتیکارلۆ” یا فەرەنسی، کارگێرییا ریال مەدرید هەمی ستافێ پزیشکی یێ یانەیێ ژ کار دویر ئێخستینە، پشتی کو دەرکەفتی پشکنینەکا خەلەت و “کارەساتبار” بۆ ئەژنۆیا کیلیان ئێمباپێ، ستێرەیێ فەرەنسی یێ یانەیێ، کربوون.
رادیۆیا ناڤبری ئاماژە ب وێ چەندێ کرییە، کو ستافێ پزیشکی پشتی هنگاڤتنا (پێکان) ئێمباپێ، ل شوینا کو پشکنینێ بۆ ئەو ئەژنۆیا ئێش هەبووی بکەن، پشکنین بۆ ئەژنۆیا “ساخ” یا وی یاریزانی کربوون. ئەڤ خەلەتییە بوویە ئەگەر کو ئێمباپێ ماوەیەکێ درێژ ب ئازار ڤە یارییان بکەت، بێی کو جۆرێ هنگاڤتنا وی بهێتە ناسین، کو نێزیک بوو ببیتە ئەگەرێ شکەستنا ئەژنۆیا وی.
ژبەر ڤێ ڕەوشێ، ئێمباپێ گەلەک یێ تووڕە بوو و پەنا برە بەر پزیشکێ پسپۆرێ ئەژنۆیێ “بێرتراند سۆنری کۆتێ” ل پاریس. ل وێرێ دەرکەفت کو دەستنیشانکرنا ریال مەدرید ب تەمامی خەلەت بوویە. ئێمباپێ د نووترین لێدوانا خۆ دا گۆت: “ئەز یێ ب شانس بووم چوومە پاریس و ل وێرێ پلانەکا دروست بۆ چارەسەرییا من هاتە دانان دا کو بگەهمە یارییێن مۆندیالێ.”
ژ لایێ خۆ ڤە، رادیۆیا “کۆپێ” یا ئیسپانی ئەڤ نووچەیە پشتڕاست کرییە و دیار کرییە کو دەرئێخستنا ستافێ پزیشکی ل مەها ئێک یا ئەڤ سالە، تنێ ژبەر زۆرییا هنگاڤتنێن یاریزانان نەبوو، بەلکو ئەگەرێ سەرەکی ئەڤ خەلەتییا مەزن بوو کو بەرامبەر ئێمباپێی هاتییە کرن.
کیلیان ئێمباپێ، کو نوکە تەمەنێ وی ٢٧ سالن، پشتی دابڕانێ ژ چوار یارییان، د یارییا ل هەمبەر ئاتلێتیکۆ مەدرید دا ڤەگەڕیا ناڤ یاریگەهان و نوکە ژی ل کەمپا هەلبژارتیێ فەرەنسایە ل ئەمریکا بۆ ئەنجامدانا دوو یارییێن دۆستانە.
بادینان دەیلی | ٢٠٢٦
