بادینان دەیلی:
سەرۆکێ فیدراسیۆنا تۆپا پێ یا فەرەنسا ئاشکرا کر کو پشتی ب دویماهی هاتنا مۆندیالا ٢٠٢٦ێ شوینگراوێ دیدییێ دیشامپی دێ هێتە ڕاگەهاندن، هەڤدەم کیلیان ئێمباپێ ژی ئێکەم کۆمێنت ل دۆر هاتنا زەینەدین زیدانی دا.
زەینەدین زیدان، کو تەمەنێ وی ٥٤ سالن، د نوکە دا ل بەر دەرگەهێ وەرگرتنا پۆستێ ڕاهێنەرایەتییا هەلبژارتیێ فەرەنسایە. ل دویڤ پێشبینییان، د ڤێ هاڤینێ دا زیدان دێ پۆستێ خۆ وەرگریت. فیلیپی دیالۆ، سەرۆکێ فیدراسیۆنا تۆپا پێ یا فەرەنسا، ڕاگەهاند کو “جێنشینێ دیشامپی هاتییە دیارکرن، لێ ئەم نەیێ بەرهەڤین نوکە ناڤێ وی ئاشکرا بکەین.”
دیالۆ گۆت ژی: “بابەتێ ڕاهێنەرێ داهاتی یێ فەرەنسا هاتییە ئێکلاکرن. هیڤییا مە ئەوە فەرەنسا بگەهیتە یارییا دویماهییێ یا مۆندیالێ، و ئێکسەر پشتی یارییێ ل ١٩ێ تەمموزا ٢٠٢٦ێ، ناڤێ ڕاهێنەرێ نوو دێ ڕاگەهینین.” هەروەسا ئاماژە ب وێ چەندێ کر کو ئەو دزانن خەلک ل چ ناڤەکی دگەڕیێن، لێ ژمارەیا وان کەسێن دشێن سەرکردایەتییا هەلبژارتیێ فەرەنسا بکەن گەلەک کێمن.
ژ لایێ خۆ ڤە، ڕۆژنامەڤانێ ناڤدار فابریزیۆ ڕۆمانۆ پشتڕاست کر کو زیدان ڕاهێنەرێ داهاتی یێ فەرەنسایە پشتی مۆندیالا ٢٠٢٦ێ. خەونا زیدانی ئەوە مۆندیالا ٢٠٣٠ێ بۆ وەلاتێ خۆ بدەستڤە بینیت و ببیتە دووەم کەس پشتی دیشامپی کو وەکی یاریزان و ڕاهێنەر ناسناڤێ مۆندیالێ ل گەل فەرەنسا بەرهەڤ بکەت.
ل دۆر ڤێ پرسێ، د کۆنگرەیەکێ ڕۆژنامەڤانی دا پرسیار ژ کیلیان ئێمباپێ، کەپتنێ هەلبژارتیێ فەرەنسا هاتە کرن. ئێمباپێ خۆ ژ ناڤهێنانا زیدانی دویر ئێخست و گۆت: “ئەز نزانم کێ دبیتە ڕاهێنەرێ داهاتی یێ فەرەنسا. سەرۆکێ فیدراسیۆنێ د دەمەکێ گونجای دا دێ ڕاهێنەرێ نوو ناسینیت. ژ من باوەر بکەن ئەز چو تشتەکی نزانم و ئەز نە پشکەکم ژ بڕیاردانێ د ڤێ پرۆسێ دا.”
بادینان دەیلی | ٢٠٢٦
