بادینان دەیلی:
ریکاردۆ کالاڤیۆری، بەرگریکارێ هەلبژارتیێ ئیتاڵیا، د دووەم ڕۆژا ئامادەکارییێن تیپا وەلاتێ خۆ دا بۆ یارییا پاشکۆیا مۆندیالا ٢٠٢٦ێ، ڕاگەهاند کو ئەو د ڕەوشەکا گەلەک باش دایە و چ کێشەیێن تەندروستی نینن.
د کۆنگرەیەکێ ڕۆژنامەڤانی دا پشتی دووەم یەکەیێ مەشق و ڕاهێنانێن هەلبژارتیێ “ئازۆری”، کالاڤیۆری دەربارەی پەیوەندییا خۆ ل گەل ڕاهێنەر گێنارۆ گاتوزۆی ب دلخۆشی ڤە ئاخفت و گۆت: “ئەز گەلەک یێ دلخۆشم ل گەل گاتوزۆی. د ڤێ ماوێ دا زێدەتر ژ دایکا خۆ ئەز ل گەل گاتوزۆی د پەیوەندیێ دا بوویمە. ئەو هەردەم پشتهەڤییا من دکەت، ب تایبەتی پشتی کو ئەز تووشی هنگاڤتنێ (پێکان) بوویم، ئەو بەردەوام ل سەر هێڵ بوو و ئامۆژگاریێن من دکرن، پاشان ل باژێرێ لەندەن سەرا من دا و پێکڤە نان خوار.”
دەربارەی یارییا ل هەمبەر هەلبژارتیێ ئایرلاندا باکوور، کالاڤیۆری گۆت: “پێدڤییە ئەم ب باشترین شێوە ئامادەکارییان بۆ ڤێ یارییێ بکەین. دڤێت وەکی یارییەکا ئاسایی لێ بنێرین و گەشبین بین، لێ هەڤدەم دڤێت گەلەک هوشیاری هێرشێن هەلگەڕیایی (Counter-attacks) بین، چونکو ئەو تیپەکا مەترسیدارن. د تۆپا پێیا ئەڤڕۆ دا ئەوان دشێن جوداهییەکا مەزن دروست بکەن، لەوما ئەم پێدڤی ب ئامادەکارییەکا تۆکمە نە.”
بڕیارە هەلبژارتیێ ئیتاڵیا ل ٢٦ێ ڤێ مەهێ (سوبەهی)، د قۆناغا پێش-کۆتایی یا پاشکۆیا پاڵاوتنێن مۆندیالا ٢٠٢٦ێ ل سەر کیشوەری ئەوروپا، مێڤاندارییا هەلبژارتیێ ئایرلاندا باکوور بکەت ب مەرەما بدەستڤەئینانا بلیتەکا مۆندیالێ.
بادینان دەیلی | ٢٠٢٦
